Ammanerulersitsinissaq suli mattunneqanngilaq

Oqarasuaatinillu angallattakkanik ammanerulersitsinissamut pilersaarut piviusunngunngitsoortussanngorpoq. Taamaakkaluartoq taamaativinneqassangitsoq, pisortaanerup erseqqissarpaa:

- Pisumi matumani allannguuteqassanngilaq, Kristian Reinert Davidsen oqarpoq.

Oqarasuaatinut angallattakkanullu ammanerulersitsinissaq Inatsisartuni amerlanerussuteqartunit unitsinneqaraluartoq, suliffeqarfissuup kisermaassisuusup tamanna sipaarfiginiarunnaaraa, pisortaanerup aalajangiusimallugu oqaatigaa.

Aamma atuaruk Ammanerulersitsiniarneq isumaqatigiinngissutaasoq

Tele-Postimilu nutarterinissaq tunaartaqarnerusumillu ingerlatsinissaq ilimagineqassasoq oqaatigalu:

- Susoqanngikkaluarpalluunniit ammanerulersitsisoqarumaartoq isumagaara.

Suliffeqarfissuup ingerlanneqarnera umeqqissaarneqassaaq suliassaqarfiillu tamakkerlugit nalilersoqqissaarneqassallutik.

- Mumisitsisoqarujussuassanngilaq, aallaqqaammulli akulikitsumik alloriallattaarnikkut ingerlatsisoqassaaq, ukiulli tallimat ingerlanerini nutarterisoqassalluni.

Aamma atuaruk Nalunaarasuartaateqarnermik ammanerulersitsiniarneq unitsinneqarpoq

Siunissamili sipaarniartoqassaaq, tassa sulisut suliunnaartillugit nutaanik sulilersitsisoqartassanngilaq, sulisooreersulli allatigut suleriaqqissinnaanerat nalilersorneqartalissalluni.

- Nutaanik atorfinitsisinissaq pisariaaruppat - sulisut ikinnerulissapput taamaaliornikkut aningaasartuutikillisaasoqassaaq.

Angusaqarusussuseqartorporlu:

- Pisisartut akikinnerusunik pitsaanerusunillu pisiassaqalissapput, pisisartullu ullutsinni akiliutimikkut annerusumik pissarsiaqarnerussallutik, Kristian Reinert Davidsen oqarpoq.

Taannattaaq oqarpoq, Telemut akisunaarutaanngikkaluartumik internettikkut pisiassat nutaat, pitsaanerusut akikinnerusullu tuniniarneqartalerpata - pisisartut amerlanerulersinneqarsinnaalluartut.

Aamma atuaruk Telekkut sullissineq ammanerulersinneqarpat iluanaarutaassaaq