Ammaanermi qallunaat arnartaat ajugaapput

Assammik arsarnermi Europami pissartanngorniunnermi ammaanermi Danmark Serbiamut 25-20-mik ajugaavoq.
Allattoq Noah Mølgaard
decembarip 08-at 2010 08:40

Naak Lærke Møller alutornartuliorluni qitini tunoqqullugu isertitsigaluartoq qallunaat arnartaasa ajugaarnerat neriuutigineqartutut annertutiginngilaq.

Oqaatigineqartut malillugit Serbia gruppemi qallunaat peqataaffigisaanni sakkukinnersaapput unammisassaat allat tassaallutik Rumænia aamma Spania.

- Serbiamut unamminitsinni immikkoortumi siullermisut minutsit 30-it marloriarlugit arsarsinnaagutta Rumæniamut ajugaanissamut periarfissasqarpugut. Immikkoortumi siullermi pitsaasorpassuarnik pisoqarpoq taakkulu ingerlatiinnarsinnaagutsigit ajornavianngilaq, taama qeqqani tunioraasoq Lærke Møller TV2.dk-mut oqarpoq marlunngornermi unnukkut unammereerlutik.

Sisamanngornermi Danmark Rumæniamut unammissaaq unamminerlu taanna KNR-TV-mi toqqaannartumik aallakaatinneqassaaq nalunaaqutaq 16.45-miit.