Ammaalluni oqalugiaat Naalakkersuisuni eqqissisimanngissutaavoq
Naalakkersuisoqatigiinnut illuatungiliuttut kisimik naalakkersuisut siulittaasuata inatsisartut ataatsimiilerneranni ammaalluni oqalugiaataa uparuagassartaqartinngilaat.
Naalakkersuisooqatigiilli ilaasa ataatsimiinneq sioqqullugu oqalugiaatip imaanik ilisimatinneqarsimannginnertik naammagingilaat.
Atassutip siulittaasuata Finn Karlsenip pisoq ajuusaarutigaa. Radioavisimulli ilisimatitsissutigalugu Hans Enoksen naalakkersuisooqatigiit ullumi ataatsimiinneranni taama pisoqaqqissanngitsoq neriorsuutigigaa.
Hans Enoksenili allatut nassuiaavoq.
- Pisoq nalinginnaavoq. Soorunami neriorsuisinnaanngilanga, pisortaqarfiit oqalugiaammut ilanngutassaat qaqugukkut tiguneqarnersut apeqqutaasarmat. Taamaattumik ajuusaarutissaqanngilanga, oqarpoq, nangillunilu.
- Oqalugiaat pineqartoq ullaassakkut ataatsip missaani piareerpoq nutserneralu inatsisartut ataatsimiilivinneranni aatsaat naammassilluni. Pinngitsaalisaallutami marlunnik oqaaseqarpugut, naggasiivoq.
