Amikoq siulittuisartoq ulorianartorsiorpoq
Tysklandip Spaniallu pissartanngorniutivinnissamut ippassaq anngunniunnissaat sioqqullugu, amikoq Paul Spaniap ajugaanissaanik siulittuivoq, taamatullu siulittuinera amikup killissarilersinnaavaa.
Amikoq Paul Tysklandimi illoqarfimmi Oberhausenimi igalaaminermi imermik immertakkami uumasuutigineqarpoq. Tysklandip Sydafrikami unamminissaa sioqqullugu, karsit marluk igalaaminermut kivisinneqarput, aappaa tyskit erfalasuannik aappaalu tyskit unammisassaasa erfalasuannik erfalasulerlugu. Karsit erfalasullit uillunik neqitserneqarput, tassuuna takuniarlugu karsi sorleq uillunik imalik amikup Paulip pilerigineruneraa.
Pinerit tamaasa karsi tyskit erfalasuannik erfalasulik soqutiginerusarpaa, taamaaliortarneralu pissutigalugu Amikoq Paul Tysklandimi amikut tusaamasaanersaraat.
Amikup Paulip siulittuinera ippassaq eqquummat, tamanna tyskinit mamiagineqarpoq, amikullu pillarlugu sianneqarnissaa piumasarineqarpoq, salatinik akullugu creme fraichemillu miseqqerlugu.
Nutaarsiassaqartitsiviup AP-p allaaserisaa malillugu, Hollandip Spaniallu VM-imi pissartanngorniutivinneranni ajugaasut, aammalu Tysklandip Uruguayillu bronzinnanniullutik unammineranni ajugaasut Paulip siulittuutigeqqaartariaqarai, nutaarsiassaqartitsivimmi AP-mi allaaserineqarpoq.
