Amiilaarnaasannerarpai

Nikoline Cortzen, Nunarput Aasaaneranut ima oqaluttuarpoq:

- Eqalunniarluta eqalunniarfigisatta eqqaaniittup Umiiviup qeqertakassaata illutaa unnuiffiginiarlugu majuarfigigaluaratsigu qullugiaqarpallaaqimmat aallaannartariaqarpugut allamullu sinikkiartorluta, aallartippoq.

Qeqertap nunataa qanga ippernaqarluartaraluartoq maanna ippernaqarsimanngilaq, anarissallu tamatigut tamaana taamaallaat takkutillattaarsimapput. Aamma igutsaqallattaasimavoq, kisianni tassa qullugiarpassuit nuna uumassuseerutivissimavaat:

- Kuuit killingi kisimik qorsooqqinnersaqarput ilarujussuali naasimanngilaq. Qullugiarpassuit suunersut paaserusunnarput, Nikoline Cortzen oqarpoq.

Qullugissat suuneri pillugit Pinngortitaleriffik paasiniaaffigaarput. Ilisimatusartoq Josephine Nymand ima nassuiaavoq:

- Tassaagunarput  pakkaluganngortussat assigiinngitsut marluk qullugiaat. Pakkalussat qasersut. Nuup Kujatinnguani Kangerluarsunnguani misissuisarfitsinni sullinernik kiatersuivipput qullugissanik ukioq manna ulikkaarpoq. Ingasalluinnarput, Josephine Nymand nassuiaavoq.

Siorna qullugiarpassuaqarneranik tusakkat aamma taamaapput, pingaartumik Kitaata Kujasinnerusuani. Sila taamaatsillugu qullugissat takkusimaartuassapput.

-Paarnaqutaannaanngitsut, aammali orpikkat, avaalaqiat, pilullu qullugissat mamarilluagaasa ilagaat, taamaattumik orpikkat taakku pilutaarutivillugit sikkersuerutiivillugillu nerineqartarnerat takornartaanngilaq. Kalaallit Nunaannili pinngortitarsuaq allanngornernut akiuussinnaasuuvoq, taamaattumik qullugissat puulinngoriarpata naasut naaqqilernissaat issilertinnagu ilimanarsinnaavoq, oqarpoq.

Ukiummi tulleriit qullugiaqartualerpat, pinngortitaq sussava?

- Tassa taanna maanna nalusarput. Maanna aasaagaluartoq nunatat ilarujussui ukiarpalaaqaat. Qullugissat pisuullutik. Kangerluarsunnguani misissuivitsinni paasissutissanik katersinigut nangissavagut. Qanoq pisoqarnissaa siunissap takutikkumaapaa, Josephine Nymand nassuiaavoq.

Nuup kujatinnguani misissuisarfik ukiut sisamassaa piuvoq.