Amigartoorutit sulerusussuseqartitsipput

48-nik ukiullip Mikael Thinghuusip pisortatut ilisimaneqaatigivaa amigartoorutiniit sinneqartoorutinngortitsisinnaanini, imaluunniit suliffeqarfimmik ilisimaneqarpianngitsumiit pingaarutilittut inissiisinnaanini, soorlu kamiliorfissuarmi Eccomi ukiuni tallimani pisortaanermini taamaaliorsimasoq. Taassuma aamma Royal Greenlandip kingullertigut amigartooruteqarluni ingerlasimanera unammilligassatut isumakuluutissaanngitsutullu isigerusunneruaa.

- Ataatsimut isigalugu 1 procentia isumakulunnartoqartippara, 99 procentialu kajuminnartutut isigalugu. Allaffissornikkut aqutsillaqqissuunngilanga, akerlianilli allannguisoqarniartillugu ingerlalluarnerusarlunga, Mikael Thinghuus oqarpoq.

Pisortaaninngortussap Aalborgip avataani Svenstrupimi Royal Greenlandip qullersaqarfianit ulluinnarni aqutsinini ingerlatissavaa. Taamaattorli Nunatsinnut akulikitsumik tikittarnissani naatsorsuutigalugu.

- Kalaallit Nunaannukartinneqartarnissara ajornartorsiutaanavianngilaq. Ajornartorsiutaasussarli tassaassagunarpoq sivisuallaamik Kalaallit Nunaanniittannginnisama pinaveersaartinnissaa. Tassami uanga avataaniit aqutsisarneq ileqqorinnginnakku. Aqutsineq ilaatigut oqarasuaatikkut ingerlanneqarsinnaasarpoq, kisiannili suliassat pingaaruteqartut najuulluni suliarineqarnissaat pingaaruteqartuuvoq. Uani aamma taama pisoqarumaarpoq, Mikael Thinghuus oqarpoq.

Illumut atortussanik pequtissanillu tunisassiorfimmit IDdesignimit qaammatini arfinilinnik sioqqutsilluni soraarniuteqartussaanini pisssutigalugu, Mikael Thinghuus kingusinnerpaamik apriilip aallaqqaatani atorfinissaaq. Neriuutigaali siusinnerusukkut soraarsinnaanissani, taamaalillunimi suliffeqarfissuup Royal Greenlandip amigartooruteqarluni ingerlanneqarneranit sinneqartoorfinngorluni ingerlanneqalersinnaaneranut suleqataalersinnaassangami. Suliassaq pisussaaffimmisut isigaa.

- Kalaallit Nunaanni pissutsinnut itinerusumik suli akulerussimanngikkaluarlunga, malugisinnaavara suliffeqarfissuaq nunamut tamarmut pingaaruteqarluinnartoq aammalu ingerlalluartariaqartoq, taamaattoqarnissaalu sapinngisara tamaat naapertorlugu piviusunngortinniassavara, Mikael Thinghuus oqarpoq.