Amigartooruteqarnissartik ilimagaat isumalluarlutilli

- Taamaakkaluartoq nioqqutissiassatta akii qaffatsissinnaasimagatsigit nuannaarutigaarput, suliffeqarfissuullu aningaasatigut ingerlanera siornamut naleqqiullugu allannguuteqangaarani ingerlasinnaammat aamma nuannaarutigaarput, Royal Greenlandip pisortaanera Flemming Knudsen oqarpoq, nangipporlu:

- Suliffissuarmik nutaamik Polenimi pisisimanerput aningaasaqarniarnitsinnut sunniuteqassaaq, amigartooruteqarnissatsinnullu pissutaassalluni. Sinneqartoorutilimmilli aappaagumiit ingerlatsiffiulissasoq ilimagaarput. Ileqqaarnertut isigineqarsinnaavoq, kingusinnerusukkut iluanaarutaalertussaq, suliffeqarfissuup pisortaanera oqarpoq.

Royal Greenlandip aningaasaqarnikkut patajaannerulernissaa pillugu suliniuteqartoqartoq Flemming Knudsen oqarpoq.

Royal Greenlandi qaammatit kingulliit arfinillit ingerlanerini isertitakinnerugaluarluni, raajanik aalisakkanillu qalerualinnik 85.900 tonsinik tunisassiaqarpoq, naallu isertitsissutiginerat siornamit annerulaaraluartut, aningaasartuuteqangaatsiarneq pissutaalluni iluanaarutissat ikinnerusimapput.

Aningaasat Royal Greenlandip qaammatit kingulliit arfinillit kaaviiaartitai 2,6 milliardit sinnilaarpai, siornamut naleqqiullugu amerlanerulaarlutik. Piffissaq siorna taamaalimmat aningaasat kaaviiaartitat 2,55 milliardiupput.