Amigartoorneq marloriaatigajammik qaffappoq

Kalaallit Nunaanni tunisat pisiallu oqimaaqatigiinnerat 2008-mi ukiup affaata ingerlanerani 833 mio. koruuninik amigartoorfiusoq naatsorsueqqissaartarfimmiit saqqummiunneqarpoq.
oktobarip 09-at 2008 11:09

Amigartoornerlu tamanna ukiumut siulianut 2007-mut sanilliullugu annertuneruvoq, tassami 2008-p aallartinneraniit ukiup affaata ingerlanerani amigartoorutaasut pineqartut 833 mio. koruuniupput, 2007-mi piffissami tassanerpiaq amigartoorutaasut 435 mio. koruuniusut.

Taamaalilluni tunisat pisiallu amigartoorutigineqarnerat ukiup ataatsip ingerlanerani marloriaatingajammik qaffassimalluni.

Naatsorsueqqissaartarfiup nalunaarutaa naapertorlugu taama amigartoorneq peqquteqarpoq nioqqutissanik eqqussuineq qaffakkiartorsimammat, tassalu imaappoq avataaneersunik pisinerulersimasugut akerlianik avammut niuerneq annikillisimalluni.