Amigartooraluaqalutik isumalluarput

Naak Nunatta Karsianiit milliardip affaanik upernaaq aningaasaliiffigineqaraluarluni nunatsinni suliffeqarfiit annersaat Royal Greenland ukiumi naatsorsuusiorfimmi kingullermi 196 millionit koruuninik amigartooruteqarpoq. Siorna amigartoorutit 78 millionit koruuniupput. Pisortaasut angusatik naammagisimaanngilaat, iluarsiissutissatulli pilersaarutitik isumalluarfigaat.
Allattoq Jens Thorin
decembarip 16-at 2009 17:11

Suut ajutoorfiusinnasut tamangajammik ajutoorfiusimagunarput.

Aningaasarsiornikkut ajornartooqqaneq, tunisakinneq, aningaasat nalikinneri siusinnerusukkullu kukkusumik aningaasaliissutigisimasanik iluarsaaneq, amigartoorutinut ukiorpassuarni aatsaat taama amerlatigisunut pissutaatinneqarput.

Amigartoorussuilli 196 millionit koruunit ukiup qaammataani siullerni arfineq pingasuni pinngorsimasut, Royal Greenlandip pisortaqarfiata erseqqissarpaa, ajornartoornermilu pilersaarusiornerup ingerlatsineq qaammatini kingullerni sisamani ilorraap tungaanut aallartissimallugu.

Pilersaarutit suliffeqarfissuup ingerlatsineranit inernera ukiuni tullerni marlunni 200 millionit koruuninik pitsaanerulersinneqassangatinneqarpoq.

Iluarseeriarnerup ilagisaanik USA-mi suliffiutini angisooq isertitaqarfiunngitsorli matusimavaa. Aamma kilisaat ataaseq Canadamiunut ukiuni tallimani attartortissimavaa.

Aammali suliffeqarfissuup iluani naammassisaqarsinnaassuseq isiginiarneqarsimavoq, ilaatigullu pisortaqarfimmi atorfiit 8 procentii atorunnaarsinneqarsimallutik. Aamma pigisat nalillit uninngasut, tassa tunisassiat quersuarniittuutit pisisullu akiligassaat, ikilisarneqarsimapput.

- Pilersaaruterput iluatsippoq. Tassami taama amigartooruteqartigigaluarluta, aningaasat tigoriaannaat 225 millionit koruuninngortippavut. Aammalu Namminersorlutik Oqartussat piginissutitik 250 millionit koruuninik ilammatigit, suliffeqarfiup akiitsuni milliardit affaanik ikilisippai. Akiitsuimi suliffeqarfissuup ajornartorsiorneranut pisooqataapput.

Suliffeqarfissuaq qangali allisarnermini akuerineqarsinnaanngitsumik akiitsunissimavoq. Aammali akiitsut pigisanut nalilinnut naleqqiullutik amerlavallaalersimapput, pisortaaneq, Flemming Knudsen oqarpoq.

Royal Greenland ukiumi naatsorsuusiorfiusumi kingullermi 2.080-inik sulisoqarpoq. 855-it Nunatsinni sulipput, aatsaat taama ikitsigalutik. Nunatsinni sulisut tama ikitsiginerannut, kilisaammik allamut attartortitsisimaneq nammassinnissinnaanerulernerlu pissutaatinneqarput.

Suliffeqarfissuarmi aamma suliffinnik nutaanik pilersitsisoqarpoq, assersuutigalugu Qasigiannguani qaleralinnik tunisassiorfik.

- Kisianni aamma tassani sulisussaaruteqqasarpugut, tamannalu uatsinnut akisuvoq. Kisianni sulisoqarniarneq pillugu pisortat oqaloqatigiuarpavut, Royal Greenlandip pisortaanera Flemming Knudsen oqarpoq.

Royal Greenlandip ukiut tulliuttut pingasut tallimalluunniit ingerlaneranni amigartoorutini ikilisarniarpai, kaaviiaartitallu 5 procentiannik sinneqartoortalernissaq siunertaavoq.

Royal Greenland siorna 4,7 milliardit koruuninik kaaviiaartitsivoq.