Aningaasanut inatsit 2017 Amigaartooruteqarneq kukkusumik saqqummiunneqartoq
- Aningaasarsiornikkut taama pisussaaffiliinermut, Demokraatit naalakkersuisuugallarnerisa nalaanni, kukkunerit pipput, aningaasarpassuarnik nalillit, inuiqatigiinni saqitsaassutigineqarput, taakkua uagut akisussaaffilerparput, suliariniarsarilerparput, aningaasanik immikkoortitseqqippugut, kissaatigineqartunut naapertuuttunngorsarlugit, aningaasaqarnermut naalakkersuisoq Aqqaluaq B. Egede Qanoorumi apersorneqarluni ataasinngornermi taama oqarpoq.
Amigartoorutit 137 millionit koruunit Naalakkersuisut siuliinit kingornussimallugit, ilaasunillu angallassinermut kiffartussinissamut isumaqatigiissutip pitsanngoriaatissaaanut 87 million kr-nit atorneqartussaanerat, isertitassallu 50 millionit koruuninik ikinnerulernerat pissutigalugit amigaartooruteqarneq pilersinneqartoq, Aqqaluaq B. Egedep apersorneqarnermini nassuiaatigaa.
Taamaammat ukiut sisamat ingerlanerini 145 millionit koruuninik amigartooruteqartumik missingersuinermut maanna Naalakkersuisut akisussaaffigivallaanngikkaat aningaasaqarnermut naalakkersuisoq oqarpoq.
Kiffartuussinissamik isumaqatigiissutit 87 millionit koruuninik akisunerulersimanerat ilumoorpoq, Egedelli naalakkersuisuunermini kiffartuussinissamik isumaqatigiissutinut 15 millionit koruuniinnarnik immikkoortitsineruvoq.
72 millionit koruunit immikkoortinneqareertut
Randi Vestergard Evaldsenip naalakkersuisunut ilaasortaanermini aningasaqarnermut inatsisip aappassaaneerneqarnerani saqqummiussinermini kiffartuussinissamut isumaqatigiissutit pitsanngoriaatissaannut 72 million kr-nit immikkoortinneqartut nalunaarutigai.
Siunnersuummi tassani amigaartoorutit ukiut sisamat ingerlanerini 1 million koruuniussaat siunnersuutigineqarpoq, taamaalilluni isertitassat aningaasartuutaasussallu oqimaaqatigiingajallutik.
Najoqqutarisaq: AIS-t aappassaaneerneqarneranut ilanngussaq D
Tapiliussatut isumaqatigiissutit ukiut siamat ingerlannerini atuuttussat 15 million kr-nik akisunerussapput.
Taakkuli 145 millionit koruuninik amigartooruteqartussamik missingersuinermut pissutaanngillat.
Isertitassat 8 millionit koruuninik ikilisut
Taakkua saniatigut isertitassanik 50 million kr-nik naalakkersuisut annaasaqartut Aqqaluaq B. Egedep eqqaavaa. Tamanna ilumooraluartoq isertitanit allanit piffissap ingerlanerani oqimaaqatigiissarneqassapput.
Aningaasaqarnermut akileraartarnermullu ataatsimititaliap isumaliutissiissutaani aamma ilanngussami isertitassat ukiut sisamat ingerlanerini 8 million kr-ninik ikinnerulissasut takuneqarsinnaavoq.
Najoqqutarisaq: AIS-t pingajussaaneerneqarnissaanut ilanngussaq I
Tassa amigartoorutissat 24 millionit koruunit kisimik Aqqaluaq B. Egedep saqqummiuppai, oqaatigineqaraluartutuulli 137 million kr-niunngitsut.
140 millionit sinnerlugit aningaasartuuteqarnerunissaq
Egedep naalakkersuisunngornerata kingorna aningaasartuutit taakku aningaasanut inatsimmut ilanngunneqaraluartut aningaasaqarnermut naalakkersuisup akisussaaffigerusunngilai.
Najoqqutarisaq: AIS-t pingajussaaneerneqarnissaanut ilanngussaq I
Dronning Ingridip napparsimavissuani meeqqanut immikkoortortaqarfimmut 47 million kr-nit, Namminersulernissamut suliniuteqarnermut 23 milllion kr-nit minnerunngitsumillu inunnik isumaginninnermut aqutsisoqarfeqalernissamut 36 million kr-nik immikkoortinneqarput, kiisalu suliniutinut arlaqartunut annikitsualunnut aningaasaliisoqarluni.
Taakkua tamaasa katikkaani 140 million kr-nit sinnerlugit naleqarput. Anigaasartuutissallu ilaat Inatsisartut aningaasanut inatsisissatut siunnersuummut suliarinninneranni takussutissanit eqikkaanermi ataaniittumi takuneqarsinnaapput:
IA-p aningaasaqarnermut oqaaseqartartuata Peter Olsenip Inatsisartut ataatsimiittarfiannit oqaatigaa, aningaasanut inatsimmi ukiunut sisamanut tulliuttunut atuuttussami 143 million kr-nit IA-p isumaqatiginniarnermi angusimagai.
IA-p aningaasaqarnermut oqaaseqartartuata aningaasartuutit matussuserneqanngitsut akisussaaffigalugit tassa saqqummiuppai.
Aamma atuaruk: Siunissami unammilligassat annikillinavianngillat
Aamma atuaruk: Naalakkersuisoqatigiit nutaat 145 millionit koruuninik
amigartooruteqarnissaq siunnerfigigaat
Aamma atuaruk: Demokraatit: Amigartoorutit qanoq matussuserneqassappat?
Aamma atuaruk: Naalakkersuisooqatigiit nutaat ima akeqarput
Aningaasaqarnermt inatsit pllugu Aqqaluaq B. Egede radioaviisimit apersorneqarusunngilaq aamma aningaasaqarnermut inatsit pillugu oqaaseqarusunnani.