Amerliartoqqilerpugut
Tassalu 2005-ip kingornagulli aatsaat Kalaallit Nunaanni innuttaasut amerleriartut, Naatsorsueqqissaartarfik nalunaarpoq, nunatsinnilu innuttaasunut tunngasut pillugit kisitsisit nutaat qanittukkut tassani saqqummiunneqarlutik.
Inuit maanga nuuttunit 189-init amerlanerusut Kalaallit Nunaannit 2009-mi nuussimagaluarput. Kisiannili ukiut siuliinut naleqqiullugu nunatsinnit nuussimasut ilaatigut ikileriarujussuarsimagaluartut ilaatigut ukiumi siuliani inunngortut 457-inik amerlanerunerannik naligiissarneqarput. Meeqqat 395-it inunngorsimapput, 438-illi toqukkut qimagussimallutik.
Ataatsimut isigalugu tassa innuttaasut 258-inik amerleriarsimapput.
Amerleriaat kommunini tamani assigiikannersumik agguataarsimavoq, Kommune Kujalleq kisimi pinnani, tassani innuttaasut ikileriarsimasut nalunaarneqarsimallutik.
Kiisalu kisitsisitigut paasissutissat takutippaat inuit amerlaqisut nunaqarfinnit ukiuni makkunani nuussimasut. Kommuneqarfik Sermersooq kisimi pinnani kommunip nunaqarfinni innuttai inunnik marlunnik amerleriarsimapput, taamaalillutillu nunatsinni kommunini allani nunaqarfinni innuttaasut ikileriarnerat nalunaarneqarluni.
Inuit 300-t sinneqalaartut 2009-mi nunaqarfimminnit nuussallutik toqqaasimapput. Qaasuitsup Kommuniani amerlanerpaallutik, tassani 188-it nunaqarfimmiikkunnaarnissartik toqqarsimallugu.
