Amerlasuut kommuunit avannarlersaat avequaat
Taakkumi isumaqarput kommuni angivallaartoq aamma innuttaasut sullinneqarnerat pitsaanngitsoq.
Kommunalbestyrelsemi ilaasortat Atassummeersut pingasut aamma siunnersuummik tamatumunnga assigususumik nassiussissamaarput.
Siunnersuuteqartut tassaapput, Enok Sandgreen Aasianneersoq, Kristian Jeremiassen Qasigiannguaneersoq, Palle Jeremiassen Ilulissaneersoq, Sakio Fleischer Uummannameersoq kiisalu Jens Danielsen Qaanaameersoq. Kommunalebestyrelsimi ilaasortat 21-iupput.
Nunarsuarmi kommuunip annersaanik, sineriaanik 1600 kilometerinik isorartussuseqartumik, 17.000-nillu innuttaqartumik, avitsisoqarnissaanut Siumumi ilaasortat arfinillit oqaatigineqareersutut siunnersuuteqarput:
- Ikaarsaariarnerup kingorna kommuuni malunnartumik nukittoriartorsimanngilaq. Illuatungaatigulli ajoraluartumik kommuunip angivallaarnera pissutigalugu nukilaannerusutut inississimavugut, naak aallaqqaataani takorluugaangaluartoq nukittunerusumik inissittoqassasoq, Kristian Jeremiassen oqarpoq.
Kristian Jeremiassen kommunip avinneqarnissaanut qinigaaffimmi siullermi siunnersuuteqarnikuungaluarpoq maannalu Siumukkormioqatiminik tallimanik allanik peqateqarluni siunnersuuteqaqataaqqppoq:
- Isumaqarpugut tassa siunnersuuteqarnitsinni innuttaasunut qaninnerusumik sullissilerutta, taava innuttaasut peqataatinnerullugit ingerlalerutta, taavalu innuttaasut oqartussaaqataatinnerullugit ingerlalerutta kommuuni nukittortinneqarsinnaasoq, Kristian Jeremiassen oqarpoq.
Qaasuitsup Kommunia marlunngorluni avinneqassappat, kommunit marluk pilersinneqarnerata aqunneqalernissaatalu aningaasartuuteqarnerulersitsisinnaanera Kristian Jeremiassenip ernumanartoqartinngilaa:
- Nukittuneruliinnassuugut. Kommuuni angivallaartoq pilersinnikuuarput. Allaat imatut inissisimasoqarpoq kommuunip angivallaarnera pillugu qinikkalluunniit annerusumik anngussinnaanatik piffinnut amerlasuunut, Kristian Jeremiassen oqarpoq. Taannami isumaqarpoq kommuuni, kommuuniusimasut arfineq pingasut maanna kattuffigisimasaat, assigiinngippallaartunik tunuliaqutaqartoq:
- Avannarpalaarutta annertoorujussuarmik aalisarnermik inuussutissarsiortoqarpoq. Taava Diskobugti isigigutsigut ilinniartoqarfimmik annertuumik ingerlatsisoqarpoq. Taava taakkua nukittoqutigut atorutsigit aammalu piffiit assigiinnerumaat kattuppata taava taamaalilluni kommuuni naligiissaruminarnerulluni inissinneqartussaavoq, taava taamaalilluta ingerlariaqqinnissatsinnut nukissat amerlanerusut pigilissagigut isumaqarpugut, Kristian Jeremiassen oqarpoq.
Qaasuitsup Kommuniata borgmesteriata, Ole Dorphip, kommunip avinneqarnissaanut siunnersuut suli takusimannginnamiuk oqaaseqarfigisinnaanngilaa.
KNR-imit paasisagut malillugit Qaasuitsup Kommuniani Atassutip ilaasortai pingasut aamma kommuunip avinneqarnissaanut siunnersuuteqarniarput.
