Amerlasuut illup iluani arsaateqataarusupput
Nunatsinni angutit inersimasut pissartanngorniuunnissaat Nuummi B-67-mit aaqqissorneqassaaq, arnat unamminissaat Ilulissani I-69-mit aaqqissuunneqassalluni.
Angutini timersoqatigiiffiit aqqaneq marluk peqataatitaqassallutik nalunaareersimapput, arnani 8-it nalunaarsimasut.
Arnat angutillu marsip 21-anit 23-anut pissartanngorniutissasut, Kalaallit Nunaanni Arsaattartut Kattuffianni siulittaasoq Lars Lundblad KNR-mut ilisimatitsivoq.
Illup iluani isikkamik arsaannermi siorna pissartanngorniuttoqarmat angutini inersimasuni iligiit 24-it peqataapput.
- Siorna peqataatinneqartut amerlavallaaluatsiarmata ukioq manna ikinnerusunik peqataatitaqassalluta pilersaaruteqarpugut. Iligiit 20-it sinnerlugit nalunaartoqarpat anngunniutsitsinissaq pilersaarutaalluni, Lars Lundblad nassuiaavoq.
Nalunaarfissaq kingulleq tassaavoq januaarip 31-at.