Amerlasuut aqerlunik sanaat peqqinnissamut ulorianarput
- Amerlasuunik aqerlunik sanaanik inerteqquteqalissagaluarpat piniartut aalisartullu inuussutissarsiutaat navianartorsiortinneqarnavianngilaq. Ukiut marluk ingerlanerani tamanna allanngortikkiartorneqarsinnaavoq. Aalajangiineq pitsaasuuvoq, amerlasoormi peqqinnissamut pinngortitamullumi pitsaasuunngilaq. Danmark Miljø Undersøgelseminngaanniimmi misisissuineq ukiut 13-it matuma siorna pisoq takutitsivoq amerlasooq aqerlumit sanaaq peqqinnissamut ulorianartoq. Paasineqarsimavormi aqerlussaq timmissap neqaaniileraangami uninngaannartartoq, taamaalillunilu nerineqartarluni, Anthon Frederiksen tusagassiutinut nalunaaruteqarnermini taama allappoq.
Amerlasuunik aqerlunik sanaanik inerteqquteqalernissamik siunnersuut tusarniaassutigineqareersimavoq, tamannalu akerliuffigineqarpallaarani isummersorfigineqarsimalluni. Naalakkersuisunit ilimagineqarpoq siunnersuutip ataatsimiissutigalugu aalajangiivigineqarnissaa qaammatip tulliani pisinnaasoq.