Amerlanerusut toqummata nuannaarpoq

Osama Bin Ladenip aaqqissuussamik peqqarniisaarniat al-Qaedakkut siuttuata, ilimagisimavaa USA-p 2001-imi septembarip aqqarnanni peqqarniisaarniarluni saassussineq pillugu akiniaajumaartoq. Taamaattumik Afghanistanimi Kandaharip eqqaani qaqqani toqqorsimaffini ulloq taaneqartoq nallertinnagu qimassimavaa.

Taama paasissutissiisoqarpoq, bin Ladenip biilertorisimasaata paarsisuatalu - Salim Ahmed Hamdan-ip – killisiorneqarnera aallartimmat. Taassuma Amerikamiut sakkutooqarfianni Cuba-miittumi Guantánamomi killisiorneqarnera aallartinneqareerpoq.

Hamdan-ip aamma oqaatigaa peqqarniisaarniat timmisartunik tiguaariarlutik New Yorkimi World Trade Centerimut qaartartutut atorpatigik, inuit 1.500-t toqutaanissaat bin Laden-ip naatsorsuutigisimagaa. Toqutaasut marloriaatingajammik amerlassuseqarnerat al-Qaedap siuttuata nuannaarutigisimaqaa.

Killisiuinikkut paasinarsissaaq Salim Ahmed Hamdan sakkutuut eqqartuussiviannut sassartinneqassanersoq, sakkutuunut eqqartuussiviit USA-mi Inatsisartut 2006-imi pilersitaraat præsident Buship nunani tamalaani peqqarniisaarniarnermut sorsunneratut taaneqartumut atatíllugu.