Amerlanerusut tapersersuilerput
Timmisartortartunut tapersersuiniarluni nalunaareersimasup 3F-ip saniatigut Dansk Metal aamma HK timmisartortartunut tapersuisiniarlutik nalunaarput. Taama Sermitsiaq ullumi allaaserisaqarpoq.
Dansk Metal-ip tapersersuinera Nunatsinniunngitsoq, Qallunaat Nunaannili timmisartunik iluarsaasartut aqqutigalugit ingerlanneqassaaq.
- Tamanna ilaatigut pissuteqarpoq tapersersuilluta sulissiumajunnaarniarutta qallunaat isumaqatigiissutaat najoqqutaralugu kalaallit isumaqatigiissutaannit pilertornerusumik iliuuseqarsinnaagatta, Henrik Nipper, Dansk Metal-ip immikkoortortaqarfiani normu 16-imeersoq, Nunatsinnilu timmisartunik iluarsaasartut kattuffimmi aaqqissuussaaffianeersoq Sermitsiamut oqarpoq.
Taamaalillutik kattuffiup ilaasortai Qallunaat Nunaanni Air Greenlandimut sullisseqqusaajunnaarput.
HK-p tapersersuilluni sulissiumajunnaarnera aamma Qallunaat Nunaanniinnaq atuutissaaq, ilaatigut suliffeqarfik Novia, ilaasussanik, nassatanik nassiussanik assigisaannillu Air Greenlandimiut sullissisartoq sullissiunnaassaaq.
Air Greenlandip nalunaarutigereernikuuaa timmisartut ingerlaanngimmata, tapersersuillutik sullissiunnaarniartut annertunerusumik sunniuteqarnavianngitsut.
- Isumaqarpallaarunanngilaq timmisartunut ingerlaanngitsunut tapersersuilluni sullissiumajunnaaraanni. Kisianni Air Greenlandi timmisartortartunik allanik atorluni ingerlaarnialissagaluarpat tapersuilluta sullissiumajunnaarnerput suli atuutissaaq, Kastrup-imi 3F-ip siulittaasua, Henrik Bay-Clausen atuagassiamut 3F-imut oqarpoq.
