Amerlanerusut ilinniagaqalernissaat Avalaap sulissutiginiarpaa
Meeqqat atuarfianni soraarummeertut affaasa missaat ilinniakkamik aallartitsineq ajorput imaluunniit sulilerneq ajorput. Innuttaasut 70 procentii meeqqat atuarfiannit qaffasinnerusumik ilinniagaqanngillat. Kisitsit taakku pitsanngorsartariaqarput, kalaallit Danmarkimi ilinniartut kattuffiat, Avalak, immikkut ittumik ataatsimeersuarnermi iliuusissamik nutaamik ilaasortanut Københavnimi arfininngormat saqqummiussimagami taama oqarpoq.
- Kalaallit Nunaanni inuusuttut ilinniagaqalernissamut kajumilersikkusuppagut; paasitillugit ilinniarneq ajornakusoortuunngitsoq, naak ilungersorluni sulinermik pisariaqartitsigaluartoq. Kalaallit Nunaanniilluni annilaanganarsinnaasutut misiginarsinnaaneratut inngitsoq takutikkusupparput, Avalammi siulittaasoq Hans Peder Kirkegaard oqarpoq.
Angerlarsimaffimmit ungasissorsuarmiilluni ilinniarnermi nalornisoorneq nammineerluni misigereersimavaa:
-2006-imi Danmarkimut tikeqqaarama kulturip allap iserfiginera tupaallaatigeqaara Danmarkillu qanoq ittoorpiarnera nalullugu. Danmarkimi ilinniagaqarnissamut inuit piareersarluarnerisigut tamanna allanngortikkusupparput.
Kattuffik Danmarkimi ilinniagaqartut oqaluttuaannik katersiniarpoq nittartakkakkullu saqqummiullugit. Aammattaaq Kalaallit Nunaanni tusagassiuutit atorlugit oqaluttuanik siammarteriniarpoq.
- Piareersarfiit kalaallillu illuisa suliassaat tigunianngilagut. Sapinngisatsinnik iliussaagut - ilinniartuuneq pillugu ilisimasavut misilittakkavullu tunniukkusuppagut. Assigiinnarpaa piniartorsuup ernerminik piniarnermik ilinniartitsinera, uagut aamma inuusuttut qanoq ilinniartoqartarneranik takutitsivigerusuppagut, Hans Peder Kirkegaard oqarpoq.
