Naalakkersuisut inuussutissarsiutigalugu aalisartut pisassallit umiatsiaaraannut 9 meterimik takissuseqartitsinissamut minnerpaaffiliinissamut ajunngitsortanik ajoqutaasussanillu misissuisinniarneqarput.Assi: KNR/Anton Gundersen Lihn

Amerlanerussuteqartut: Umiatsiaaqqat minnerpaamik 9 meteriusalissasut

Aalisartut akuersissutaatillit pisassallit siunissami minnerpaamik 9 meterimik takissuseqartumik umiatsiaaraqartalernissaat, Siumumit, Henrik Fleischer siunnersuuteqarpoq. Tamanna aalisartut imaani sillimaniarnerunissaannik aningaasaqarluarnerunissaannillu pilersitsissaaq.

Silap pissusiata allanngoriartornerata malitsigisaanik sinerissap qanittuani umiatsiaararsortut imaani sillimaniarnerat qularnarsiartorsippaa. Siumumit Inatsisartunut ilaasortaq, Henrik Fleischer taama isumaqarpoq.

Umiatsiaarartut suliaqarnermi atugassarissaarnerunissaat qulakkeerniarlugu inuussutissarsiutigalugu aalisartut pisassallit ullumikkut minnerpaamik 6 meterimik umiatsiaaraqaqqusaasut minnerpaamik 9 meterimik takissuseqartumik umiatsiaaraqartalernissaat siunnersuutigaa. 

AAMMA ATUARUK Politiit angutip Nuummeersup ujaarinera unitsikkaat

- Tassa qularnanngitsumik angissutsinik naleqqutinngitsunik killilersuivallaarnerup aammalu atuivallaarnerup tamatuminnga kinguneqartitsisinnaasarsimasinnaalluni. Tassami ilaatigut takuneqartarput umiatsiaaqqat mikisut inuussutissarsiornissamut akuerisaanngitsut aalisarnermi atorneqartut ilaat pukkitsuararsuullutik tikilersut, Henrik Fleischer siunnersuummini allappoq.

Taamaammat Naalakkersuisut inuussutissarsiutigalugu aalisartut pisassallit umiatsiaaraannut 9 meterimik takissuseqartitsinissamut minnerpaaffiliinissamut ajunngitsortanik ajoqutaasussanillu misissuisinniarpai.

Anginerusumik umiatsiaaraqalernissamut piffissaqarluassasoq

Umiatsiaaqqat minnerpaamik 9 meterinik takissuseqalernissaat piumasaqaataalissappat tamanna Fleischerip oqarnera naapertorlugu ukiut aqqaneq-marluk ingerlanerani piviusunngoriartortinneqassaaq.

Piffissami tassani aalisartuaqqat umiatsiaraararerisaminnik taarsiinissaminnut akiliisinnaanissamut periarfissaqassapput. Tamatuma saniatigut umiatsiaararsorlutik aalisartut Namminersorlutik Oqartissanit ukiut aqqaneq-marlukkaarlugit inuussutissarsiuteqarnermut tapinik, umiatsiaaqqamik nutaamik sanaartornissaminnut qinnuteqarsinnaatitaasarput.

AAMMA ATUARUK KNI Royal Greenlandilu Naajaanut tunissuteqarput

Ukiunik aqqaneq-marlunnik periarfissaqartitsineq umiatsiaararsorluni aalisartorpassuarnut pisassalinnut sulinerup annertunerulersinnissaanut periarfissiissasoq, Fleischerip erseqqissaatigaa.

Inatsisartuni amerlanerussuteqartut tapersiisut

Siunnersuullu Siumut sinneranit Demokraatiniillu taperserneqarpoq, Aalisarnermut, Piniarnermut Nunalerinermullu ataatsimiititaliami amerlanerussuteqarfigineqarlunilu siunnersuut Inatsisartunit aappassaaneerneqartussanngortinneqarpoq.

Henrik Fleischerilli nammineq partiiata, Siumup ikaarsaariarnermut piffissaliussaq ukiut tallimaannaasariaqarsoraa.

Naalakkersuisut siunnersuut tamakkiisumik taperserpaat.

Naalakkersuisut akissuteqaamminni ilanngullugu aalisarnermi tamarmi angallatit tamarmik ataatsimoortumik pisassiissuteqarfiunatik immikkut pisassiissuteqarfigineqartalernissaat kissaatigineqarnerarpaat. Tamanna aalisartunut ataasiakkaanut patajaannerusumik sinaakkusiissasoq, nassuiaammi allassimavoq.

AAMMA ATUARUK Naalakkersuisut hæver kvote til det dobbelte af biologers anbefaling

Demokraatit ’umiatsiaaqqani tamani AIS atortulinnik VHF-eqarnissaanut GPS-imullu atortoqarnissamut piumasaqaateqartoqalissappat tamanna aalisartunut ataasiakkaanut qanoq kinguneqassanersoq’ aamma naliliiffigitikkusuppaat.

Inuit Ataqatigiit umiatsiaaqqat takissusissaannut piumasaqaat 6 meterimit 9 meterimut tallineqarnissaa ammaffigaat, taamaakkaluartorli Naalakkersuisut pisassiissutinik agguaasarnermut allanngortitserusunnerat pissutigalugu akerliullutik taasillutik.

Partii Naleqqap siunnersuut aamma itigartitsissutigaa.

Siunnersuut Inatsisartuni ataasinngorpat aappassaaneerneqassaaq.

Umiatsiaararsorluni aalisarnermik inuussutissarsiutillit tamarmik inatsisissatut siunnersuummi pineqartut siusinnerusukkut allapparput. Umiatsiaararsorlunili aalisartut pisassallit pineqarput. Tamanna allaatigisami qulaaniittumi naqqipparput.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat