Naalaakkersuisut oqarnerat naapertorlugu nunatta inuiaqatigiivisa nunatsinnut nunanit allanit takornariat kaaviiaartitatigut 392 millionit koruuningajannik isertitaqarfigaat.Assi: KNR / Anton Gundersen Lihn

Amerlanerussuteqartut takornarianut unnuisartunut akitsuutit misissorusukkaat

Nunarput takornarianut piumasaqanngippallaartarpoq. Nunatsinnut takornariat nunatta karsianut akitsuutitigut akiliinerusalissapput, Atassut unnuinermut akitsuutinik misissuerusuttoq taama isumaqarpoq.

Atassutip nunatsinnut takornariat nunatsinni akunnittarfinni unnuinerminnut atatillugu nunatta karsianut akitsuutitigut akiliinerusalertariaqarsorai.

Atassutip Inatsisartuni ilaasortaatitaata Aqqalu C. Jeremiassenip naalakkersuisut unnuinermut akitsuusiinerup iluaqutissartaanik pitsaaqutaanillu misissueqquai.

- Nunatsinnut takornarianut ilaguutiavallaarlutalu tunuarsimaarpallaarpugut, aamma piumasaqarfiginngippallaarpavut, Atassut siunnersuutiminut tunngavilersuutimini taama allappoq.

AAMMA ATUARUK Visit Greenlandip misigisassarsiornertalimmik takornariartitsineq qammarusukkaa

Siunnersuutaa Inatsisartunit sapaatit akunnerani kingullermi oqaluuserineqarpoq, partiillu tamarmik akitsuummik nutaamik atuutilersitsinerup nunatsinnut takornariat ikilinerannik kinguneqannginnissaanik qulakkeerinnittoqartariaqarneranut isumaqataapput. Partiilli amerlanerussuteqartut isumaqarput akitsuusiisoqarsinnaanissaa misissuiffigineqartariaqartoq.

40 koruuninik akitsuusiineq 5,2 millionit koruuninik isertitaqaataasinnaasoq

Nunatsinnut takornariat affaat nunatsinni akunnittarfinni unnuinerminnut akitsuutitigut 40 koruuninik akiliisalissappata tamanna nunatta karsiata kaaviiaartitatigut ukiumut 5,2 millionit koruuninik isertitaqassutigisinnaagaa Atassutip assersuutitut naatsorsuutaasa inernerisa ersersippaat.

Atassutip aamma ilassutigaa, Nuummi Ilulissanilu mittarfissualiortoqarnissaanut isumaqatigiissutip inaarutaasumik aalajangiivigineqareernerata kingorna unnuinermut akitsuusiisoqarnissaa eqqartussallugu ingalluni naleqqulluinnalersimasoq. Ilimagisammi naapertorlugit mittarfissuassat ammarpata nunatsinnut takornariat amerlinerannik malitseqassammata.

Naalakkersuisut partiit amerlanerussuteqartut unnuinermut akitsuusiisoqartalernissaata misissuiffigineqarnissaata pisariaqarsorinninnerannut tapersiigaluarlutik taamatut aaqqiisoqarpat ilumut eqqortuliortuunerussanersoq qularnartoqalaartinnerarpaat.

Akitsuutinik appaanerit aamma iluaqutaasinnaapput

Inuussutissarsiornermut naalakkersuisup ilaatigut oqaatigaa, paarlattuanik iliorneq tassa akitsuutinik appaaneq pissutigalugu nunatsinnut umiarsuarnik takornariat amerlisimasut.

Naalaakkersuisut oqarnerat naapertorlugu nunatta inuiaqatigiivisa nunatsinnut nunanit allanit takornariat kaaviiaartitatigut 392 millionit koruuningajannik isertitaqarfigaat.

Demokraatillu naalakkersuisooqatigiinnut tapersersuisuusut siulittaasorisimasaat Randi Vestergaard Evaldsen takornariat akitsuusiivigineqarnissaannut ukiup matuma aallartinnerani aamma siunnersuuteqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat