Amerlanerussuteqartut Kuannersuarni piiaanissaq tapersersorpaat

Narsap eqqaani Kuannersuarni piiaanissap pilersinneqarnissaa pillugu paasiniaanermi, aperineqartut 961-iupput. Akissuteqartulli iluanni 56 procentit assut tapersersuipput, tapersersuinerullutillu, 22 procentit akerliunerullutik imaluunniit assut akerliullutik, sinneruttullu 22 procentit nalornipput.

Angutit arnanit amerlanerusut piiaaffeqalernissaq ajunngitsutut isigigaat apersuinerup paasinarsisippaa, inuusuttullu tamangajammik piiaffeqalernissaq akuersaarpaat. Akissuteqartulli inuussutissarsiutaat qiviaraanni ilinniarsimasut, namminersortut, aalisartut piniartullu akornanni piiaaffeqalernissamut ajunngitsumik isumaqartut amerlanersaapput.

Nuna tamakkerlugu paasiniaanerup saniatigut Kujataani illoqarfinni nunaqarfinnilu innuttaasut isumaannik HS Analyse immikkut ittumik paasiniaavoq. Piiaaffeqalernissaq Kujataaneersut 80 procentiisa taperseraat paasineqarpoq.

Paasiniaanermi paasineqarpoq, Inuit Ataqatigiit qinersisigisartagaat piiaaffeqalernissamut akerliunerpaasut. Partiilli tamarmiusut qinersisigisartagaasa amerlanerusut piiaaffeqalernissaq taperserpaat.