Amerlanerujartuinnartut Okalik tunuaqquaat

Allattoq Najaaraq Egede
juulip 08-at 2007 13:09

Nunavut-mi naalakkersuisut siulittaasuat Paul Okalik atorfimminit tunuartariaqarpoq. Taama piumasaqarpoq Nunavut-mi Kommuneqarfiit Kattuffiat. Kattuffiup tunuaqqusilernermigut arnat peqatigiit Okalik-up tunuarnissaanik piumasaqaataat illerpaa.

Canadami inatsisartunut parlamentimut ilaasortaq, Tagak Curley, tusagassiorfinnut Ottawami ullumi aamma nalunaarpoq, Paul Okalik naalakkersuisut siulittaasuattut tunuartariaqartoq.

Paul Okalik Labradorimi ippassigami nerersuaqatigiinnermi, arnaq Kommuneqarfiit Kattuffianni pisortaasoq kusananngitsunik oqaluffigisimavaa.

Naallu Okalik utoqqatsereeraluartoq amerligaluttuinnartut tunuarnissaa piumasaraat.

Nunavut-mi Naalakkersuisut siulittaasuat pisuusaarneragaavoq, tassami arnamik oqqassilinnginnermi siuninnguagut arnanik persuttaasarneq pillugu ataatsimeersuartuni arnat kusanaatsuliorfigineqartarnerat uperuartorsimavaa. Maannami arnanut persuttaasarnermut akerliusutut upperineqanngilluinnarpoq.