Amerlanerit Josef toqqarpaat

Josef Motzfeldt Inatsisartut siulittaasuattut inississagaluarpat partiit siulittaasuisa qanoq igissaneraat apersuutigaarput.

- Partiinut ammasorujussuuvunga partiit kikkulluunniit siunnersuuteqarsinnaanerat ammatippara. Oqarsinnaanngilangali Josef Motzfeldt tapersersussanerlugu, Atassutip siulittaasua Finn Karlsen oqarpoq.

Taanna erseqqissaavoq Inatsisartuni namminneq gruppe-minni ilaasortatik tikeriarpata aatsaat kina siunnersuutigilersaarneritsik aalajangiunniaritsik.

Demokraatit siulittaasuata Per Berthelsenip Josef Motzfeldt Inatsisartut siulittaasuattut piukkukkaa ullumi radio aviisimi aammattaaq eqqartorneqarpoq.

Taamatuttaaq Kattusseqatigiit partiiata siulittaasuata Anthon Frederiksenip Josef Motzfeldt piukkuppaa.

Josef Motzfeldt aperaarput Inatsisartut siulittaasuattut inississagaluaruni suut pingaartinnerussanerai.

- Inatsisartuni oqallittarnerit oqalugiaqattaarnerunngitsumik oqallinnivittut ingerlasalernissaat piunnaarlugu sukkanerusumik eqaannerusumillu ingerlasalernissaat anguniarusuppara, Josef Motzfeldt oqarpoq.

Taanna erseqqissaavoq tamanna anguneqassappat Inatsisartut oqallittarfianni atortulersuutit allanngortinneqariaqassasut.

- Soorlu oqaaseqartoq siunnersuuteqartorluunniit oqaluttarfimmiitiinnarlugu ilaasortat apeqquteqarusuttullu issiaannarlutik apeqquteqapallattarlutik. Taamaalilluni pinerit tamaasa oqaluttarfimmukaqattaarnerit piunnaassagaluarput, taamaalilluni oqallinnerit uummaarinnerusumik ingerlanneqartalissagaluarput, Josef Motzfeldt oqarpoq.

Aammattaaq erseqqissaatigaa, atortulersuutit nutaaliat atorlugit innuttaasut malinnaatinneqarnissaat pingaartillugu anguneqartariaqartoq.