Amerlanerit inuunermik naammagisimaarinnipput
Kalaallit Nunaanni innuttaasut inuunerminnik naammagisimaarinnipput. Tamanna issittumi innuttaasut isumaannik misissuinerup, 2004-mi aallartittup, ersersippaa. Aperineqartut 94 procentii inuunerminnik naammagisimaarinnillutik akissuteqarput.
Allattoq Louise M. Kleemann
januaarip 23-at 2009 08:25
Inuit 1.200-t sinerissami illoqarfinneersut nunaqarfinnilu 22-neersut misissuinermi apersorneqarput. Apersuinermi apeqqutit 200-t Nunatsinni inuunermut tunngasut akineqarput.
- Tupaallannarnerpaasimavoq una. Inuit ataasiakkaat inuunerminnik qanoq naammagisimaarinnitsiginerannik aperigaanni, toqqagassikkatsigit akunnattumik naammagisimaarinninnersut naammagisimaarinnittupilussuunersut, imaluunniit naammaginninnginnersut, taava taakkua 94 procentii naammagisimaarinnittupilussuullutilluunniit naammagisimaarinnipput. Ulluinnarni inuit atugaat takoreerlugit naammagisimaarinninnerat paasillugu eqqarsariaallannaqaaq, issittumi inuuniarneq pillugu ilisimatusartoq, Birger Poppel oqarpoq.
