Amerlanerit imigassaq matoqqunngilaat

Imigassat kimiittuut Ammassallip kommuneani tuniniarneqartarnerisa inerteqqutaalernissaat pillugu innutaasut maajip ulluisa 29-anni taasitinneqarmata, taasisut amerlagisassaanngillat.
Allattoq Louise M. Kleemann
juunip 13-at 2008 08:22

Ammassallip kommuneani taasisinnaasunit 1869-iusunit 19,6 procentit taasipput. Taasisoqarneranili erseqqippoq imigassat kimittuut tuniniarneqartarnerisa inerteqqutaalernissaat isumaqatigineqanngimmat, taasisinnaasut 62,4 procentii inerteqquteqalernissamut isumaqataanatik taasimmata. Taasisinnaasut pingajorarterutaat, tassalu 37,6 procentii, imigassat kimittuut tuniniarneqartarnerisa inerteqqutaalernissaannut isumaqataallutik taasipput.

Ammassallip kommuneani nunaqarfinni taasisoqarnerani Sermiligaami innuttaasut amerlanerussuteqartut imigassat kimittuut tuniniarneqartarnerisa inerteqquttaalernissaanut isumaqataapput. Kommunip sinnerani inerteqquteqalernissamut isumaqataanngitsut amerlanerussuteqarput. Ammassallip kommuneani amerlanerussuteqartut taasinerat atuutsinneqassasoq, borgmester Vittus Mikaelsen-ip nalunaarutigaa.

Imigassat kimittuut pillugit Ammassallip kommuneani innutaasunik taasititsinerup inerneri aatsaat avammut saqqummiunneqarput, Radioavisimit ujartorneqarnerisa kingorna.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq