Amerikap Korea Avannarleq assuaaraa
Umiarsuaq sorsuut Koreami qeqertaasamut maanna ingerlaartoq, nutaarsiassaqartitsivimmi Ritzauimi allaaserineqarpoq.
Præsident Barack Obamap Korea Kujallermut illersuinini isertuutinngilaa, Korea Kujallermilu qeqertamut Yeonpyeongimut Korea Avannarliup ippassaq saassussinera assut assuaralugu.
Inuit sisamat qaartarumeerinermi maannamut toqupput. Sakkutuujunngitsut timaat marluk Korea Kujallermi qeqertami ullaaq manna nassaarineqartut, sinerissami alapernaarsuisunit nutaarsiassaqartitsivimmut AFP-mut uppernarsarneqarpoq. Sakkutuujunngitsunik toqutaasoqarsimaneranik aatsaat tutsiuttoqarpoq. Sakkutuut imarsiortut marluk toqutaasimasut ippassaq tusarliupparput.
Sakkutuut sapaatiuppat sungiusarnissaat USA-p Korea Kujalliullu aalajangiusimallugu akipput.
Korea Kujallermi præsidenti, Lee Myung-bak, Barack Obamap unnuaq isumaqatigiissuteqarfigaa, isumannaatsuunissaq pillugu USA-p Korea Kujalliullu qanimut suleqatigiinnerat nukittorsarniarlugu, kiisalu eqqissisimasoqarnissaa aamma isumannaatsuunissaq sulissutiginiarlugu, sapaatiuppat sungiusartoqarnissaa aalajangiusimaannassagitsik. Præsidentip Illorsuanit tamanna nalunaarutigineqarpoq.
Amerikamiut umiarsuaat sorsuut, timmisartut aallartarfigalugulu mittarfiat, USS George Washington, Tokyomiit ullaaq aallarpoq, timmisartunik sorsuutit 75-inik sakkutuunillu 6000-inik usilluni, umiarsuarsuarlu Koreami qeqertaasamukarpoq.
Korea Avannarlermi nutaarsiasaqartitsivik naalagaaffimmit aqunneqartoq, KCNA, aatsaannguaq nalunaarpoq, Korea Kujalliup saassussinera pissutigalugu Koreami qeqertaasami sorsuttoqaleriaannaasoq.
Ajornartorsiorneq pissutigalugu Naalagaaffiit Peqatigiit Isumannaallisaaniaqatigiivi ullumi kingusinnerusukkut sukkanerpaaq atorlugu oqaloqatigiinnissamut aggersarneqarput.
