USA-p Danmarkimut aallartitaa Alan Leventhal, nunatsinnut aggustip 11-ianiit 15-iata tungaanut nunatsinniissalluni. Nunatsinniinnerminilu pilersaarutinik ulikkaarpoq. Assi: U.S. Department of State

Amerikap Danmarkimut aallartitaat Nunatsinnut tikeraarpoq

Amerikap Danmarkimut aallartitaat nunatsinnut tikeraarnermini meeqqat atuarfiani ilinniartitsisut, naalakkersuisullu naapinniarpai.

USA-p Danmarkimut aallartitaa nunatsinnut tikippoq.

Amerikamiut aallartitaat Alan Leventhal Nuummut Kangerlussuarmullu tikeraartussaq, aggustip 11-anit 15-iata tungaanut nunatsinniissalluni.

Alan Leventhal Nunatsinniinnermini naalakkersuisut siulittaasuat Muté B. Egede (IA) nunanullu allanut naalakkersuisoq Vivian Motzfeldt (S), nunatta USA-llu akornanni ataatsimut soqutigisaat pillugit ataatsimeeqatigissavai.

Taamak USA-p nunatsinni konsulateqarfia tusagassiutinut nalunaarummik allappoq. 

Tikeraap nunatsinni inuussutissarsiornermi siuttut, nunatta USA-llu niueqatigiinnerannik nukittorsaanissaq pillugit oqaloqatigissavai.

Ilinniartitsisut naapissavai

Alan Leventhal Nuummiinnermini meeqqat atuarfiannut pulaassamaarpoq, tassanilu amerikamiut nunani tamalaani ineriartortitsinermik sullissivia U.S. Agency for International Development (USAID), nunatsinnilu meeqqat atuarfiisa akornanni ilinniartitaanikkut suleqatigiinnerat, sulisoqarnikkullu ineriartortitsineq oqaloqatigiissutigissavaat.

Amerikamiut aallartitaat Nuup kangerluanut, kalaallit amerikamut aaqqissuussanut assigiinngitsunut pikkorissariarnikut angalaaqatigissallugit.

Amerikamiut aallartitaata, tikeraarnini naggaserlugu sermersuatta qeqqani, silap pissusaanik ilisimatusartut misissuiviannut tikeraarnini naggasissagaa, USA-p nunatsinni konsulateqarfia taamak nalunaarpoq.

Suliniutit USA Kalaallit Nunaallu akornanni ingerlanneqartut 

Nunarput USA-lu akunnerminni isumaqatigiissuteqareerput, isumaqatigiissullu ukioq kingulleq septemberimi atsiorneqarluni.

Isumaqatigiissutip ukiut tamaasa suleqatigiiginnarnissaq attatiinnarniarlugu USA Kalaallit Nunaannut iluaqutaasussamik, ukiumut to millioninik aningaasarpoq. Aningaasat isumaqatigiissutigineqartut katillugit 10 millioninik naleqarput, taakkulu  amerikamiut ineriartortitsinermut suliffeqarfianit USAID-imeersuupput.

AAMMA ATUARUK Nunarput USA-p millioninik aningaasaliinissaanut isumaqatigiissusiortoq

Isumaqatigiissummi tassani ilinniartitaanermut, turisteqarnermut aatsitassarsiornermullu tunngasunut 63 millionit koruuninik tapersiillutik.

 



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl