Amerikap aallartitaa nunatta ingerlaqqinnissaanut ikiuukkusuppoq

Aallartitarlu nuannarineqartoq, pingajussaa nunatsinniittoq alutorsartitsivoq.

- Tikiinnarluni nunap pinnissusersuanit periarfissaanillu aammali unammilligassassinnit killitsinnanngitsuunngilaq, Rufus Gifford KNR-imut oqarpoq.

AAMMA ATUARUK Olsvig: Nunatta USA-llu suleqatigiinnerat nutaamik eqqarsaatigeqqittariaqarparput

Aallartitap kaffisortitsinermigut nunatta inuusuttai naapikkusuppai, nammineq nunaminik taakkua qanoq misiginerat tusarusullugu. Aamma Nunatta USA-llu suleqatigiinnerulernissaannik anguniagaqarpoq.
 
-Aaqqiissutissarsiortariaqarpugut, Kalaallit Nunaatalu alloriaqqinnissaani tullermi Amerikamut periarfissaq sunaassanersoq uanga paasiniarsaraara.

-Takornarianik amerlisaanikkuussanersoq, annaassiniarnermik sungiusarnertiguussanersoq, aningaasaliissuteqarnikkuussanersoq, tamakkorpassuit suleqatigiissutigisariaqakkavut, Rufus Gifford oqarpoq.

Rufus Gifford Amerikap Danmarkimi aallartitaatut siorna ivertinneqarpoq, ullullu 14-it qaangiutiinnartut nunat akornanni suleqatigiinnissaq pillugu ataatsimiinnermut peqataajartorluni Ilulissiarluni.