Nuuk Amerikamiut tusagassiisarfianit tusaamaneqarluartumit sammineqartoq

Nunarsuarmi tusaamaneqarluartoq tusagassiisarfimmi TIME-mi, nunarsuarmi ornigassat pitsaanerpaani ukiumoortumik allattorsimaffiani Nuuk ilaalerpoq.
Nuummi sissaq atuarlugu aqqusininnguit arsarnerillu takunissaannut periarfissaqarluarnerata pingaarnertut, nunatta illoqarfittut pingaarnersaata takussutissiamut inissinneranut qularnaarinnipput. Assi © : Malik Brøns / KNR
juulip 21-at 2021 16:18
Nutserisoq Naja-Vivi Mikaelsen

Nunarsuarmi takornariarfigissallugit pitsaanerpaat ilaannut Paris Sydney-lu allattorsimaffiit ilanngunneqartarput.

Massakkullu Nuuk tassunga ilannguppoq.

Tassami ornigassat pitsaasut tusaamaneqarluartumi Amerikamiut tusagassiisarfianni TIME-imi allattorneqarsimapput.

World’s Greatest Places to Visit 2021”-mik taaguuteqarpoq.

Allattorsimaffik takornarianut najoqqutassaavoq ataatsimoortoq, ukiut tamaasa aaqqissuisut suliassamullu paasisimasaqarluartut nunarsuarmit tamaneersut suleqatigalugit saqqummersinneqartartoq.

Taamaasillunilu Nuuk aaqqissuisuniit suliassamullu paasisimasaqarluartuniit soqutigineqarluni.  

Nuummi sissaq atuarlugu aqqusininnguit arsarnerillu takunissaannut periarfissaqarluarnerata pingaarnertut, nunatta illoqarfittut pingaarnersaata takussutissiamut inissinneranut qularnaarinnipput.

Tamanna Visit Greenlandip nuannaarutigaa.

- Aap, Nuuk allattorsimaffimmut ilanngunneqarnera pingaaruteqarpoq, tassuuna pitsaasumik nittarsaanneqaratta, Nunarsuarmi akisuasutullusooq ittumik, Visit Greenlandimi aqutsisuuneq, Tanny Por oqarpoq.

- Tamanna soqutigeqqusaarinermut iluaqutaassaaq, takornariaannaanngitsunut, kisianni pilerisaarinermik sulinitsitsinnut iluaqutaaqaluni.

- Tusagassiortut allat aggersarsinnaalissavagut uagutsinnik pitsaasumik oqaluuserinnikkusuttunik taavalu siunissami allattorsimaffinnut allanut ilanngunneqarsinnaalissalluta.