Amerikamiut: Tunup imartaa uuliaqarfissuusinnaavoq
Amerikami oqartussat isumaat naapertorlugu nunatsinni tunup imartaa nunarsuarmi uuliaqarfissuit ilagisinnaagaat, Norskit aviisiat Dagens Næringsliv allappoq.
Amerikamiut oqartussaasui isumaqarput nunatsinni tunup imartaa suli nassaarineqanngitsunik uuliat nappartat 110 milliarditut annertutigisunik uuliaqarluarsinnaasoq. Allaat uuliaqarfissuit Saudi-Arabiamiittut affaasut annertutigisunik.
Nunatta Danmarkillu nunarsuarmi uuliamik qalluisut annerpaartaannut ilanngussinnaanerat Aatsitassanut Ikummatissanullu Pisortaqarfiup pisortaata Jørn Skov Nielsen-ip periarfissaqarsoraa.
- Nunarsuatsinni uuliamik qalluisut annerpaartaasa ilagilersinnaalluarpaatigut, iluatsitsissaguttalu ukiuni tulliuttuni qulini maanngaanniit uuliamik tunisassiorsinnaanngorsimassaagut. Jørn Skov Nielsen Dagens Næringsliv-imut oqarpoq.
Massakkorpiaq Kalaallit Nunaanni uuliasiorneq ingerlalluarpallaanngilaq. Statoil 2000-imi Kalaallit Nunaata eqqaani uuliamik ujarlernermi arfinilissaat ingerlappaa.
