Amerikamiut, tuluit qallunaallu sakkutuui nuannarineerutilerput
Amerikamiut, allallut naalagaaffiit killiit sakkutuuisa suliaat, ukioq 2005-imi afghanistanimiut 67 procentiisa naammagisimaaraluarapaat, BBCilli isumasiuinera naapertorlugu, ullumi naatsorsuutigineqarpoq 30 procentiinnaat Amerikamiunut ilagisaanullu naammagisimaarinnittuusut.
Afghanistanimiut tapersersuiunnaarnerannut pissutaanerpaavoq, naalagaaffiit killiit sakkutuuisa pikitsitsisut malersortillugit, timmisartuniit qaartartumeerisarnerminni sakkutuujunngitsunik toqutaqartarnerujussuat. Iluaqutaanngitsumik. Allaammi maannakkut afghanisatanimiut affai toqqissisimajunnaarsimallutik.
Amerikamiut præsidentiat, Barack Obama ippassaq tusagassiortunik katersuutsitsigami oqarpoq, silatusaarlutik aaqqisuulluakkamik talebanit qimaaffigisinnaasaat nugusartariaqartut. Pakistanip ilaani, Balutjistanimi illoqarfiit pingaarnersaat, Quetha, immikkut eqqumaffiginiarneqarpoq, tassami taanna Afghanistanimi perulluliorfiunerpaaffiusup eqqannguaniimmat.
Afghanistanimi Talebanit uppisinneqanngikkallaramik nuimasortaat, Pakistanip imikkoortortaani tamaani qimaaqqanissaat ilimagineqarpoq. Ilaatigut, ataasiinnarmik isilik, Mullah Omar, taamani Afghanistanimi pissaaneqarnerpaat ilagisaat.
– Sakkutuut suliassaat, pisortatigut suliniutit innuttanillu ikiuiniarnissat ataqatigiissaaqqissaarnerusariaqarpavut, Barack Obama ippassaq tusagassiortunut oqarpoq.
