Aaja: Amerikamiut soqutiginninnerannut isornartussarsiortariaqarpugut
Aaja Chemnitz Larsen amerikamiut pilersaarutaanni sunarpiaq pineqarnersoq pillugu paasisaqarumalluni nunanut allanut tunngasunut ministerimut arlalinnik apeqquteqaateqarpoq.
- Siullermik Danmarkip Naalakkersuisullu isumaqatigiissutigisaat amerikamiullu mittarfinnut aningaasaliinissanut soqutiginnilernerat imminnut atassuteqarnersut paasissallugu pingaaruteqarpoq, Aaja Chemnitz Larsen oqarpoq.
AAMMA ATUARUK USA-p nunatsinni mittarfinnut aningaasalersuinissamut periarfissat misissorniarai
Illoqarfiit sorliit pineqarnersut paaserusukkai
Amerikamiut illersornissamut ministereqarfiata nunatsinni mittarfinnut aningaasaliinissamut soqutiginnillutik nalunaaruteqarnerminni sakkutuunit sakkutuujunngitsunillu atorneqartut eqqartormatigit, Folketingimut ilaasortap immikkut maluginiarpaa.
- Taava eqqarsarpunga, soorlu assersuutigalugu Ilulissat Qaqortorluunniit sakkutooqarnikkut mittarfeqarfissatut siunissami eqqarsaatigineraat paasissallugu soqutiginarpoq. Illoqarfiimmi taakkua imaluunniit Kangerlussuaq pineqarnersoq Inatsisartunut ilaasortanit paasissallugu soorunami pingaarpoq, Aaja Chemnitz Larsen oqarpoq.
AAMMA ATUARUK Nunarput periarfissarissaarpoq
Sakkutooqarnikkut najuunnerulerusuttut
Pissaanilissuit soorlu Rusland Kinalu Issittumut soqutiginninneruleriartuinnaraluartut Issittup sakkutuunit akerleriiffiunnginnissaa anguniarlugu USA-p Issittumi sakkutooqarnikkut najuunnerulernissani kissaatigigaa anguniagassatut nalunaarummi ilaatigut allaqqavoq.
Amerikamiulli tamanna anguniarlugu sakkutooqarnikkut nunatsinni najuunnerulernissamut periarfissarsiornerat, Issittumi sakkutooqarnikkut alliliiniarnerannik tikkuussivoq, Aaja Chemnitz Larsen isumaqarpoq.
- Tassanilu uuma nunatsinnut iluaqutissiiginnassanersoq eqqarsaatigalugu isornartussarsiortariaqarpugut. Uani sunarpiaq pineqarnersoq paaaseqqissaartariaqarparput, Aaja Chemnitz Larsen oqarpoq.
Amerikamiut illersornissamut ministereqarfiata erseqqissaatigaa anguniagassatut nalunaarutigineqartoq inatsisitigut pituttuisuunngitsoq isumaqatigiissutaareersullu taarserneqanngitsut.
AAMMA ATUARUK USA-mut isumaqatigiissut nunatsinnut iluaqutaasinnaasoq