Amerikamiut senatorii: Trumpip Kalaallit Nunaannut sioorasaarinermigut USA sanngiillisaraa
Danmarkip nunanut allanut ministeriat Lars Løkke Rasmussen (M) Kalaallit Nunaatalu nunanut allanut naalakkersuisuat Vivian Motzfeldt, Washingtonimut tikeraarmata USA-mi senatorinit arlalinnit pingasunngormat taperserneqarput.
- USA-mi Kongressimi Kalaallit Nunaata nammineersinnaaneranik tapersersuinitsinnik inuiannillu ataqqinninnitsinnik ersersitsinissaq pingaaruteqarpoq, republikanerit sinnerlugit senatori Lisa Murkowski Løkkemik Motzfeldtimillu ataatsimeeqateqareerluni oqarpoq.
Taanna republikanerit partiianni Trumpimik isornartorsiuisartutut ilisimaneqarpoq, aamma Trumpip Kalaallit Nunaannut politikkianut sivisuumik akerliuniarluni piareersarpoq.
Danmark Kalaallit Nunaallu tapersersoriartorniarlugit, Københavnimut tallimanngorpat tikissaaq.
Aamma senatorip attaviitsup Angus Kingip Trump ataatsimiinnerup kingorna avoqqaaraa.
- Kalaallit Nunaannut sakkutooqarnikkut akuliunnissaq, Ukrainemut tapersersuiunnaarnerup saniatigut, USA-p kukkussutigisinnaasaasa ajornerpaartaraat. Taamaaliornerup sanngiillisissavaatigut, Angus King oqarpoq.
Iligisat annaaneqassasut
Taanna USA-p illersornissamut isertortumik paasiniaanermut ataatsimiititaliaani ukiut 13-it sinnerlugit ilaasortaavoq. Angus Kingip oqarnera naapertorlugu, tamatuma USA-p piginnaasaata immikkut ittup sorpiaaneranik paasinnilersippaa.
- Nunarsuup sinneranut sanilliukkutta, iligisaqarnerput iluaqutigaarput. Kina pisisartoqarpoq uagulli iligisaqarpugut. Rusland pisisartoqarnanilu iligisaqanngilaq.
- Nunamut Nato-mi ilaasortaasumut sakkutooqarnikkut akuliunnissamik oqaluuserisaqartilluta, NATO-mi suleqatigiinneq sanngiillisikkutsigu, taava iligisagut annaassavagut. Tamanna kukkunerujussuussaaq, Angus King oqarpoq.
USA-p iligisaqanngikkuni Kinamut sorsunnermi kisimiissaaq. Pissutsini taamaattuni kisimiilluni ajugaanissaq qularnarpoq, oqaatigineqarpoq.
Nunanut allanut ministerip Lars Løkke Rasmussenip (M) senatorit ataatsimeeqatigiinneq "ataavartumillu tapersersuiuarnerat“ pillugit qutsavigai, tamannalu Københavnimi tallimanngorpat tikeraalerpata takuteqqinneqarnissaa naatsorsuutaavoq.
- Vivian Motzfeldt sinnerlugu uangalu imminut aamma, ataatsimeeqatigiinnitsinnut qujavugut. Københavnimi tallimanngorpat naapeqqikkumaarpugut oqaloqatigiinnerpullu tassani nangillugu.
- Kikkut tamarmik FN-ip isumaqatigiissutaa Danmarkillu Kunngeqarfiata nunap immikkoortuisa ataqatigiinnerannik ataqqinninnissaat USA-mi inatsisartuni senatimilu ilaasortat erseqqissartariaqarpaat, Løkke oqarpoq.
Annerusumik iliuuseqarnissaminut piareeqqasoq
Akerlianilli oqarpoq Danmark Issittumi isumannaallisaanermut tunngatillugu, USA-p ernumassutaanut tusarnaarnissaminut piareersimasoq sakkussiornerlu ingerlatiinnassagaa.
- kikkut tamarmik issittoq ukiut qulit matuma siornatigut eqqissisimaffiusorigaluaraat allaanerusumik maanna inissisimalerpugut.
- Pissutsit allanngorput, iliuuseqarnerunissatsinnullu piareersimavugut, Lars Løkke Rasmussen oqarpoq.
Taamaakkaluartoq Lisa Murkowskip Angus Kingillu oqariartuutaat kongressimit tamakkiisumik isumaqataaffigineqanngilaq.
Tamanna pingasunngornermi erseqqissivoq, senatimi amerlanerussuteqarluartut aalajangersagaq Trumpip Kongressimit akuerineqaqqaarnani Venezuelamut sakkutooqarnikkut akuliunniarneranik unitsitsisinnaasimasussaq itigartimmassuk.
Taasinerup inernera 51-50-imik akerleriissutaasoq, nutaarsiassaqartitsivik Reuters allappoq.
Trumpip parteeqatai Republikanerit pingasuinnaat siunnersuut tapersersorpaat, Demokraatit tamarmik akuersillutik.
USA-mi præsidentip tullersortaa J.D. Vance taasiartorluni pingasunngormat Capitol Hillimukarpoq, Kongressimut. Taaseqataanera siunnersuutigineqartumut amerlanerulersitsinnginnissamik qulakkeerisoq, taama Amerikami nutaarsiassaqartitsivik CNN allappoq.
/ritzau/
