Amerikamiut sakkuutiitik Afghanistanimiittut nakkutiginngilaat

USA-p sakkut Afghanistanimut nassiussani nakkutigeqqissaanngilai, tamatumalu kinguneranik sakkorpassuit tamakkua nassiunneqartut Talibaninit pigineqalersinnaapput. Amerikamiut nalunaarusiaani tamanna atuarneqarsinnaavoq.
Allattoq Lotte Holm
februaarip 12-at 2009 10:46

Ukiut kingulliit sisamat ingerlaneranni sakkut 240.000-init amerlanerusut USA-p Afghanistanimut nassiussimavai. Sakkut taakkua pingajoraarterutaat sumut pisimanersut USA-p ilisimasaqarfiginngilaa.

Sumiiffeerussat tassaapput sakkut oqinnerusut, soorlu aallaasit eqqarasuartaatit, aallaasit, qoorortuut aamma qaartartut igeriuttakkat. Nalunaarummi oqaatigineqarpoq, Amerikamiut sakkutuuisa sakkut ataasiakkaat normullit ilaannamininngui kisiisa ilisimagaat. Sakkut ilarpassui Amerikamiut 2004-p 2008-llu akornanni Afghanistanimut nassiunneqartut, sakkutuut sakkussaasiviinut, Aghanistanimiunit aqunneqartunut inissinneqartarsimapput.

Nalunaarusiamilu oqaatigineqarpoq, sakkussaasiviit qisuinnarmik matoqartut nivingasunillu parnaarsaateqartut. Taamalu sakkut tammaannanngikkunik tillinneqarsinnaanissaat ilimanaateqarluinnartoq nalunaarusiami oqaatigineqarpoq.

Amerikamiut nakkutilliisoqarfiat GAO taama nalunaaruteqarpoq, nalunaarullu tusagassiortunut agguaanneqareersoq ullumikkut saqqummiunneqartussatut ilimagineqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq