Amerikamiut sakkutuuisa mingutsitarpassui
Canadamiut amerikamiullu sakkutuuisa sakkussiaqarnikkut atortukorpassui sumi tamaani mingutsitsipput – ingammik Nunavumi – mingutsitsineq ilimagisamiit annertunerujussuuvoq.
Pilersaarutaasimagaluarpoq saliinissaq 2008-mi naammassineqassasoq, kisianni Canadamiut naalakkersuisuisa saliinissamik killiliussaq sivitsortariaqarsimavaat saliineq 2013-imi aatsaat naammassineqartussanngorlugu.
Sakkutuut sakkussiaqarnikkut atortukorpassui qimaannakkat akuutissanik arrortikkuminaatsunik akullit assut mingutsitsisimapput – ilaatigut sanaartukkat PCB-nik akullit isaterneqartariaqartarsimallutik.
Saliineq 2003-imi aallartippoq, saliinerullu 2013-imut sivitsorneqarnera Canadami naggueqatigiit inuit akornanni nuannaarutaavoq. Ilaatigut qulakkeerneqar-tussanngormat saliinissaq inuit akornanni 2013-ip tungaanut suliffissaqartitsilissasoq.
- Kikkut tamarmik saliinissaq pissarsiffigaat. Inuit aningaasarsiorfissaqalerput, sulinermik sungiusarneq ukiorpassuarni suli ingerlasussaq aamma iluaqutaassaqaaq, suliniummi pisortaasoq, Nick Monteiro, Canadamiut Illersornissamut Ministeriaqarfianneersoq CBC-News-imut oqarpoq.
