Amerikamiut sakkutuui sakkutuujunngitsunik amerlavallaanik toqutsisarnerarneqarput

Aviisimi New York Timesimi ullumikkut saqqummersumi tuluit sakkutuuisa naalagaasa arlallit amerikamiut sakkutuui Afghanistanimiittut inuinnarnik sakkutuujunngitsunik amerlavallaanik toqutsisarnerarlugit isornartorsiorpaat. Aamma danskit ilaata ikiuiartortup oqaatigaa sakkutuut nunanit tamaneersut Talebanit sorsuuttartuinik akiuiniarnerminni sakkutuujunngitsunik toqutsisarnerat Afghanistanip nutaamik sanaartorfigineqarneranut ajoqutaasoq. Christian Jepsen danskit ikiuiniaqatigiiffiannit Dakkar-imeersoq ima oqarpoq:
aggustip 09-at 2007 17:06

- Ilaquttat ikinngutillu toqunneqaraangata, ingammik illoqarfinni annerusuni eqqissiviilliortoqalersarpoq. Akerliussutsimik takutitsisoqartillugu ingerlavissaarussinnaasarpugut suliniarnittalu unitsikkallarnissaa pisariaqalersinnaasarluni, Christian Jepsen oqarpoq.

Ikiuiniaqatigiiffik Dakkar toqqaannartumik saassunneqartanngikkaluarpoq, suliassatillu pilersaarutit naapertorlugit ingerlassinnaasarlugit. Tamatumunnga pissutaavoq suliniarnerminni afghanistanimiunik aqutsisoqartarnerat.

- Ikiuiniartuugaluarluta malugisarparput taama pisoqartillugu nunani allamiut tamarmik isoriniarneqalersartut. Tassa naalakkersuisut, nunat allamiut sakkutuui, politiit ikiuiniaqatigiiffiillu uatsitut ittut akerliuffigineqalersarput, Christian Jepsen Dakkarimeersoq Afghanistanip illoqarfiisa pingaarnersaanniit taama oqarpoq.

Aviisimi New York Times-imi ullumi saqqummersumi tuluit sakkutuuisa naalagaasa aterminnik taaserusunngitsut Afghanistanip kujataani tatigineqalersinnaannginnertik naammagittaalliuutigaat. Tamatumunnga pissutaanerarpaat amerikamiut sakkutuuisa timmisartumiit saassussisarnerat, tuluillu oqaatigaat amerikamiut taama saassussigaangata sakkutuujunngitsunik amerlavallaartunik toqutaasoqartartoq. Tuluit oqarput amerikamiut saassussinerini afghanistanimiut sakkutuujunngitsut Talebaninit amerlanerusut toqutaasartut.

Irakip naalakkersuisuisa nalunaarusiaanni nutaami aammattaaq oqaatigineqarpoq amerikamiut saassussisarneranni sakkutuujunngitsut toqutaasarnerat Afghanistanimi kisimi ajornartorsiutigineqanngitsoq.

Nalunaarusiami oqaatigineqarpoq, Irakimi sakkutuujunngitsut 1652-it juuliinnami toqutaasimasut. Taakkua qaammatip siulianut naleqqiullugit pingajorarterummik amerlanerupput, februaarimilu toqutaasunit amerlanerulaarlutik, tassami qaammat taanna USA Bagdadimut amerlanerusunik sakkutuuliivoq innuttaasut sakkutuujunngitsut ikiorserniarlugit.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq