- Kim Kielsen, amerikamiut præsidentiannik Donald Trumpimik ataatsimeeqateqaleruni oqaluttuarisaanermi siullerpaalluni Kalaallit Nunaani naalakkersuisut siulittaasuattut siullersaalluni USA-p præsidentianik ataatsimeeqateqassaaq.Assi: Malik Brøns/KNR // Gage Skidmore/Flickr Creative Commons

Amerikamiut præsidentiannik ataatsimeeqateqarnissaq siulleq

Nunarsuarmiut issittumut soqutiginninnerisa annertusiartornera pissutigalugu USA-mi præsidentip Kalaallit Nunaanni naalakkersuisut siulittaasuat ataatsimeeqatiginiarpaa, oqaluttuarisaaneq pillugu ilisimatooq Daniel Thorleifsen taama naliliivoq.

Kim Kielsen nunarsuarmi pissaaneqarnerit ilaat, amerikamiut præsidentiat Donald Trump ataatsimeeqatigileruniuk oqaluttuarisaanermi siullerpaamik Kalaallit Nunaani naalakkersuisut siulittaasuat  USA-p præsidentianik ataatsimeeqateqassaaq.

Tassami Namminersorlutik Oqartussat Siulittaasuat, amerikamiut præsidentiannik siornatigut ataatsimeeqatigiinnissamik qaaqquneqarnikuunngilaq. 

Taama oqarpoq, oqaluttuarisaaneq pillugu ilisimatooq aamma  Nunatta Katersugaasiviani  pisortaq Daniel Thorleifsen. 

- Immikkut illuinnartuuvoq, ilisimasakka naapertorlugit, Kalaallit Nunaani Naalakkersuisut siulittaasuat siullermeerluni USA-mi præsidentimik ataatsimeeqartussaavoq, Daniel Thorleifsen oqarpoq.

USA-p Kalaallit Nunaata inissisimanera nalunngittariaqarpaa

Taamaattumik Kielsenip Kalaallit Nunaata naalagaaffeqatigiinni inissisimanera atorluartariaqarpaa, oqaluttuarisaanermik pillugu ilisimatooq oqarpoq. 

- Naalagaaffeqatigiinni naligiimmik suleqatigiittoqarnera, Kalaallit Nunaatalu tassani inissisimanera oqaluttuarisariaqarpaa.  - Issittumi pissutsit oqaluuserineqassatillugit oqaloqaltigiinnerni taakkunani Kalaallit Nunaata peqataanissaa pinngitsoorneqarsinnaanngilaq, Daniel Thorleifsen oqarpoq.  

AAMMA ATUARUK Trump-møde er næste skridt i amerikansk charmeoffensiv

Daniel Thorleifsenip erseqqissaatigaa, silap pissusaata allanngoriartorneratigut issittumi umiarsuit ingerlaarfii nutaat periarfissaalernissaannut  niuernikkullu periarfissat nutaat ammaanneqarnissaannut  issittoq amerikamiunit soqutigineqarnerulersimammat, taamatullu Kina aamma Rusland Kalaallit Nunaannut soqutiginnilersimammata. 

- Nunat allamiut Kalaallit Nunaannut soqutiginninnerat annertusiartorpoq sermersuup aakkiartornera aallartimmalli.  Tamanna issittumi tamarmi umiarsuartigut angallavigineqarsinnaalerannik periarfissiivoq, Ingammik Kina aamma Rusland issittumut soqutiginninnerulerput, taamaattumilu tupinnanngitsumik USA Kalaallit Nunaannut soqutiginninerulerpoq qanittumillu attaveqarnerulerluni, Thorleifsen oqarpoq. 
 

Pituffik pinngitsoorani oqaluuserineqartussaq
Kalaallit Nunaat USA-lu sakkutooqarnikkut ataatsimoorussaqarput, amerikamiummi sakkutooqarfiat Pituffimmiittoq 1953-mi pilersinneqarpoq. 

Oqallisigineqartuartarpoq.  Amerikamiut Kalaallit Nunaani sakkutooqarfeqarnerat, Kielsenip Trumpillu ataatsimiinnerani oqaluuserineqassappat tamanna nutaarsiassaasoq, Thorleifsen nassuiaavoq.  

- Ukiorpassuanngortuni oqaluuserineqartarpoq.  

Tamanna danskit nunanut allanut tunngasunut ministereqarfiata USA-milu nunanut allanut ministereqarfiata akornanni oqaluuserineqartarpoq, toqqaannartumillu Kalaallit Nunaat ataatsimeeqatigineqassanani. Taamaattumik nutaarsiassaavoq, Kalaallit Nunaat ataatsimeeqataanissamut qaaqqussaammat, Thorleifsen oqarpoq.   

AAMMA ATUARUK Præsidentip naalakkersuisut siulittaasuat naapeqatigisussanngoraa

Oqaluttuarisaaneq pillugu ilisimatuup naatsorsuutiginngilaa ataatsimiinnermi pingaarutilinnik isumaqatigiittoqarnissaa. 

- Illersornissamut tunngassuteqartut aallarniutaasumik oqaloqatigiissutigineqassapput, tusaamanngilanga atsioqatgiinnissamik  arlaannilluunniit siunniussisoqarneranik, kisianni qularnanngilaq. Aallarniutaasumik  oqaloqatigiinnerit aamma Pituffimmut tunngasumik ilaqassasut, Daniel Thorleifsen taama naggasiivoq.

Donald Trump Danmarkimut tikeraassaaq septemberip ulluisa aappaanni pingajuannilu. 

Kim Kielsenip ataatsimeeqatigineqarnissaata saniatigut ministeriuneq Mette Frederiksen aamma Savalimmiormiut lagmandiat Aksel V. Johannesen ataatsimeeqatigineqassapput. 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat