Amerikamiut piisaarpallaarujussuarsimapput
Aningaasarliulernerulli, præsidentitaarnerullu kingorna eqiilersutut ipput. Europamiunit kingoqqisut USAmi nunassiffigisimasaasa kujasissuani ukiut marluk matuma siorna pinngortitap nukinginit illoqarfeerannguaq 1.000-t missinginik biibili maleqqissaarlugu inuuniartunit inulik, Greensburg, naalagaaffimmi Kansasimiittoq piuneerunneqarpoq.
Borgmesteriata Bob Dicksonip illoqarfeeraq upperluarniaqatinilu pinngortitap nukiinit piuneerussaq pinngortitap tunniussinnaasai iluaqutsiullugit nutaaliornialersoq ima oqarpoq:
- Guutip pissarititai atorluarlugit illoqarfipput Greensburg nappaqqissavarput.
Illoqarfeeqqap kommuuniata allaffia isaniku atoqqitanik sananialerpaat. Seqernup qinnguaasa nukinginik qaliani, anorisaatinillu innaallagialersorniarpaat; nunallu kissassusaa iluaqutsiullugu kiassarnialerlugu.
- Aatsaat tassa periarfissaq, kiisami piviusunngortinneqalerpoq, Jill Ellers, anorersuarnerani ilaquttanilu pisuussutaarussimasut, taartiseqqammersorlu pinngortitap nukiinut akiuusinnaasumik illutaaqqammersoq isumalluarpaluppoq.
Illumik sannaat uuliamik akeqanngingajattumik kiassarneqanngitsoq torrallannialerunarpaat. USA pinngortitamik mianerinnittumik præsidentitaarallartillugu innuttaasut eqiilerput.
- Uagut kinguaariit sipaarnermik nalaataqanngilagut. Pinngortitaq atornerlussimavarput. Maannali kinguaassatta atugassaat eqqarsaatigalugit allamik eqqarsartariaqalerpugut, Greensburgip borgmesteria Bob Dickenson nassuerpoq.
