Amerikamiut Kinamiullu ataatsimeeqatigiipput

Amerikamiut Kinamiullu Washingtonimi ulluni makkunani ataatsimeeqatigiipput. Aningaasaqarneq aningaasarsiornikkullu ajornartorsiorneq oqaluuserineqartussat pingaaruteqarnerit ilagaat. USA-mmi Kinallu niueqatigiinnerat nunanut taakkununnga pingaaruteqarluinnarpoq.
juulip 28-at 2009 09:37

Kinap USA-llu attaveqatigiinnerata ukiut 2000-it pingaarutilimmik sunniuteqarfigiumaarpaa, USA-p præsidentiata tikeraani Kinamiut tikilluaqugamigit oqarpoq. USA Kinalu aningaasaqarnikkut imminnut ullumikkut ima ataqatigiitsigaat aappaata aningaasaqarnera ajalusoorutigineqarpat aappaa nakkaateqataajumaarluni.

Kina ullumikkut dollarinik ima uninngasuuteqartigaaq allaat dollarinik atuineruleraluaruni USA annertuumik sunnertussaallugu, Jesper Rangved niuernermik ilisimatusarfimmi CBS-imi Københavnimiittumi ilisimatooq oqarpoq.

Amerikamiut Kinami pisiortorluarsimanerisigut Kina dollarinik uninngasuuteqarlualersimavoq, illuatungaanilu Kina Amerikamiunit pisiortorpallaarsimanani. Taamaammat Kinamik niueqateqarnerup makittarissisinneqarnissaa præsident Obamamut USA-mullu pingaaruteqarluinnarpoq. Aammali aningaasarsiornikkut ajornartorsiornerup pitsaasumik kingunilimmik qaangeriartornissaanut aqqutissiuussiniartussaapput.

Jesper Rangvedip ima nassuiarpaa:

"Kinamiut aningaasanik atuineruleraluarpata pitsaassaqaaq, pisiassaasa ilaat soorunami USA-mi sanaajussapput taakkunanngalu pisiortornerulerpata USA-p Kinamut niueqateqarnermini amigartooruterpassui ikiliartulissagaluarput.

Kina dollarerpassuarnik atuisussaavoq USA-llu aningaasarsiornikkut ajornartorsiornerminit aniguiniarnera nakkutigilluarlugu. USA-p niueqateqarnermigut amigartoorujussuannginnissaa Kinamiut neriuutigaat peqatigitillugulu USA-mi aningaasarsiorneq ilorraap tungaanut aallarumaartoq neriuutigalugu.

Washingtonimi oqaloqatigiinnerup nunat taakku tatigeqatigiinnerulernissaanik kinguneqarnissaa præsident Obamap neriuutigaa."

Vibeke Rask Grøn-ip ilanngutassiaa Aqqalu Olsvigimit kalaallisuunngortinneqarluni atuarneqarpoq.