Amerikamiut Issittup imartaani aqqartartunik misiligaapput
Tassungalu atatillugu sakkutuut imarsiortut Alaskap avannarpasinnerusortaani illoqarfiit Barrowip Prudhoe Bay-illu avannaani sungiusarniarlutik aallartisartut. Sungiusarneq isertuunneqaqqissaaraluarpoq, aqqartartummi atomitortut issittumi qanoq atorneqarsinnaaneri, atortuilu misilerarneqartussaammata. Aqqartartut atomitortut marluk ilaatinneqartussat appaa tassa USS Helena, taannalu Californiami San Diegomiit, sapaatip akunnera kingulleq aallarpoq.
Aqqartartulli aappaa, USS Annapolis, USA-p kangisinnerusortaani, Norfolk, Virginiamiit Alaskap avannarpasinnerusortaanukassaguni, Kalaallit Nunaata kangiatigut ingerlasinnaavoq, Nunarput avannaqqullugu, nunat tamat imartaatigoorluni. Taamaanngippat Nunatta kitaa sinertussaassavaa, sullualukkullu Alaskap avannaanukassalluni. Sullualuullu eqqaani imartaq Canadap nammineq killeqarfimmi iluaniittutut isigimmagu, aqqartartoq tamaanaqqutissappat Canadamiut akuerseqqaartariaqassapput. Akuersissummilli tunisisoqarsimanersoq ilisimaneqanngilaq.
Issittup imartaani pisunut naggueqatigiit Inuit oqartussaaqataatitaannginnerat Canadami mamiagineqarpoq, taamaammallu Canadap USA-llu, immaqalu Kalaallit Nunaata akornanni issittup imartaanut atatillugu nutaamik isumaqatigiissusiornissaq pisariaqarsorineqalerluni.
