Amerikamiut Issittumi aallartitaqarusupput
Nunap ilaani, USA-mut taama pingaaruteqariartuinnartigisumi soqutiginnikkaluttuinnartunilu, aallartitaqartoqanngimmat inatsisartunut ilaasortat paasiuminaatsippaat.
USA-p issittumut soqutigisaqarnera qulakkeerniarlugu aallartitaqalernissap qulakkeerneqarnissaa innuttaasut sinnerlugit, tassa Inatsisartut aappaanni, sinniisoqarfimmi, ilaasortap, Demokratiusup, Rick Larsenip, kunngiitsuunermillu tapersersuisup, Jim Sensenbrennerip, kissaatigigaluarpaat.
- Taamaattumik suliffeqarfeqalertariaqaraluarpoq, taava aaqqiissutissaqalissagaluarpoq, taakku oqarput.
- USA-p niuernermut, avatangiisinut isumannaallisaanermullu ataqatigiissinnaalernissaanut nunap ilaani aallartitaqalernissaq alloriarnerussaaq pingaarutilerujussuaq!
USA sikumut aserorterunnik marlunnik umiarsuaateqarpoq, Rick Larsenilli, aamma naalagaaffimmi Washingtonimi demokratinut ilaasortap, Maria Cantwellip, isumaat naapertorlugit, umiarsuit sikumik aserorterutit amerlisinneqartariaqaraluarput.
Sensenbrenner-Larsenikkut inatsisissatut siunnrsuutaat naapertorlugu, USA Issittumi aallartitaqalissagaluarpat, aallartitap taassuma politikki akisussaaffilissagaluarpaa, USA-lu Issittumi Siunnersuisoqatiinni aappaagu 2015-imi siulittaasunngorpat aallartitaq taanna Siunnersuisoqatigiinni siulittaasunngussagaluarluni.
Canada, Rusland, Island, Danmark Finlandilu Issittumi Siunnersuisoqatigiinni ilaasortaatitaqartunut ilaapput.