Amerikamiut Irakimit angerlararnialerput
Amerikamiut angerlaralernerat Irakimi persuarsiutaavoq, taamaakkaluartoq, amerikamiut nunamiiginnaqqullugit qaartartumeerisoqartarnissaa ilimanartoq Københavns Universitetimi naalagaaffinnik ingerlatsineq pillugu lektori Peter Viggo Jakobsen.
Irakimiut sakkutuui Irakimi illoqarfiit pingaarnersaanni Bagdadimi allorassaaqalutik aqqusinerni ullumi ingerlaaqatigiipput, assullu innuttaasunit nuannarineqarlutik. Amerikamiut sakkutuuisa Irakimit anialernerat nalliussiniarlugu inoqannginnersami aamma tusarnaartitsersuarneqassaaq. Irakimiummi nuannaarutissaqarput.
- Irakimi innuttaasut ukiuni kingullerni arlalissuarni atugarliorsimaqaat, maannali siunissaq qaamanerusoq ornippaallusooq, ullumikkumiimmi nammineq nunaminni isumannaallisaanerit akisussaaffigileqqippaat. Amerikamiut sakkutuui ukiuni arfinilinni nakkutilliisooreerlutik angerlakaalermata, Peter Viggo Jakobsen oqarpoq.
Kisianni Irakimiut sillimassagunaqaat tassami peqqarniisaarniat al-qaeda-kkut allallu sakkulersorlutik akiuuttartoqatigiit pikitsitsiniassasut ilimanarluinnarmat.
- Ilimagaara ulluni tulliuttuni 14-ini qaartartumeerinerit arlallit pissasut. Aamma ilimagaara eqimattat allat amerikamiut sakkutuuisa Irakimi nakkutilliiginnarnissaannik kissaateqartut naalakkersuisunut piumasaqaatiminnik saqqummiussissasut. Kisianni ilimagineruara Irakimi politikerit sapinngisamik eqqisseqatigiinnissaq anersaaralugu suligunik innuttaasunut sunniutissasoq, Peter Viggo Jakobsen oqarpoq, nangillunilu.
- Naatsorsuutiginngilarali qaartartumeerinerit nunap qanoq ingerlaqqinnissaanut tikkuussisuussasut, naatsorsuutigaarami innuttaasut eqqisseqatigiillutik inuussappata nunami naalakkersuisut Irakimi inuiaat pingasunut annernut avissimasut kurderit, sunnit, shi-llu suleqatigiillutik eqqissisimatitsiniarniartariaqartut. Suleqatigiillutimmi Iraki siuarsarniarunillu iluatsissinnaassavaat, Københavnip Universitetiani lektori naggasiivoq.
Amerikamiut sakkutuui tamarmik Irakiminngaanniit aninngikkallassapput, naatsorsuutigineqarpormi amerikap sakkutuuliussai kingulliit 2011-mi angerlarassasut DR allaaserinnippoq.
