Amerikamiut inuussutissanik piserusupput akii apeqqutaatinnagit
Inuiaat assigiinngitsut nerisassaataat amerikami ilisimaneqarput, nutaanillu takkuttoqarnissaa utaqqiinnarneqarpoq.
Nerisassanik tuniniaasarfissuarnit saaffigineqartarpugut, nerisassiassanik nutaanik pitsaalluinnartunik nioqqutigineqarsinnaasunik ilisimasaqarnersugut apersuisunik Anders M Klöcker radioaviisimut oqarpoq. Nerisassianik pitsaasunik nutaanik USAmi tunisassiorneq unamminartorujussuuvoq. Aningaasaatilissuit nerisassianik nutaanik piserusuttuupput akia apeqqutaatinnagu, taamaattumillu Kalaallit Nunaata USAmi tunisassiorsinnaanera periarfissaqarluartutut nalilerpara Anders M Klöcker oqarpoq. Kalallit Nunaata USAllu akornanni toqqaannartumik timmisartukkut ingerlaartoqartalerneratigut,
danskillu Washingtonimi aallartitaqarfiani Washingtonimi pisortanik attaveqarneratigut, Joint Commitemilu isumaqatigiissuteqartoqarneratigut, inuusutissat suut tuniniarneqarsinnaanersut misissorneqarsinnaapput misilittarneqarlutillu Anders M Klöcker oqarpoq. Tuttut umimmaallu neqaat amerikamiunut tunissassiarineqarsinnaalluarput, ataatsikkulli amerikamut tamarmut tunisassiarinagit, annikitsukkuutaanik neriniartarfinnik suleqateqarluni isumaqatigiissuteqarlunilu, tunisassiarineqarsinnaapput nittarsaallugillu, Anders M Klöcker danskit Washingtonimi aallartitaqarfianni inuussutissat pillugit siunnersorti oqarpoq. Pisiniarfissuit neriniartarfillu nuna tamakkerlugu pigineqartut attavigineqarsinnaapput isumaqatigiissuteqarfigalugillu, nerisassiap suminngaaneersuunera suunera oqaluttuassaartaalu nittarsaallugu, tamannalu misilissinnaavarsi Anders M Klöcker Danskit Washingtonimi aallartitaqarfiani inuussutissat pillugit siunnersorti oqarpoq.
Kalaallit Nunaanni inuussutissat USAmut tuniniarneqarsinnaanerat pillugu isumasioqatigiinnermi peqataavortaaq John Roberts Amerikami inuussutissat pillugit nittarsaassinerit annertunersaanni siulitaasuusimasoq, maanakkullu siunnersortitut sulisoq, taanna oqarpoq inuussutissat nunamit sumit aallaaveqarnersut amerikamiunit eqqarsaatigineqarneq ajortoq taamaattorli nunamit allarluinnarmeersunit amerikamiut piserusussasut, kalaallillu nunaat nioqqutissiulernissaanut naammassasoq. Amerikamiut nunarsuarmit tamaneersunit nerisaqarput, kinamiullu nerisassaataat amerikamiut nerisassaataannit nerineqarnerupput. Kalaallit Nunaanni ileqqut iluatsitallu malinnaaffiginissaat USAmut soqutiginarnerussapput. John Roberts oqarpoq.
Amerikamut inuussutissanik tunisassiorsinnaaneq pillugu isumasioqatigiinneq, danskinit amerikamiunit kalalallinillu peqataaffigineqartoq ualimut katuami aallartippoq aqagulu ulloq naallugu ingerlanneqassalluni.
