Amerikamiut Hans Enoksenimit ulapputigineqassapput

Amerikamiut nunatsinnut tikeraartut Ilulissani naapissallugit naalakkersuisut siulittaasuannit Hans Enoksenimit ulluni tulliuttuni ulapputigineqassapput. Alcoa-p nunatsinni aluminiumik aatsitsiviliornissaanik isumaqatigiissut unnugu nalunaaqutaq arfineq marlunut atsiorneqassaaq.
Allattoq Mads Lynge
maajip 25-at 2007 16:58

Isumaqatigiissut 15 milliardi koruuninik naleqarpoq. Alcoap sinniisai Amerikamiit nunatsinnut toqqaannartumik aqqut atorlugu ippassaq nunatsinnukarput. Alcoap sumi alumiiniumik aatsitsiviliorsinnaanissani misissuiffigilertussaavaa, isumaqatigiiissut atsiorneqareeriarpat, naalakkersuisut siulittaasuata allattaa, Ulrik Josefsen radioaviisimut oqarpoq.

Hans Enoksen-ip Ilulissaniinnermini suliassaasa tulleraa, Amerikami inatsisartut siulittaasuata Nancy Pelosi-p Ilulissiarnerani ingerlaqatiginissaa. Amerikami inatsisartut siulittaasuata, silaannaap allanngoriartornerata sunniutai sermersuarmut takuniassavai.

Pelosi malitsinnilu, amerikami kongres-imi ilaasortat 15-it atorfilittallu 15-it, Amerikallu Danmark-imi aallartitaa James Cain aqagu unnukkut arfineq pingasut qeqqanut ilulissanut tikissapput, akunnerullu affaa qaangiuttorlu sermersuarmut aallassaput, sermersuarmi ilisimatusarfik Swiss Camp alakkassallugu. Sapaatiuppat ullo’qeqqanut nereqatigiinneqassaaq, kingornalu Ilulissat Kommuneat ataatsimeeqatigineqassalluni.

Nancy Pelosi-p nunatsinniinnerani suleqatigiinnissamik isumaqatigiissusiortoqassanersoq maannakkut oqaatigineqarsinnaanngikkallarpoq, Hans Enoksen amerikamilu inatsisartut siulittaasuat ataatsimeeqatigeqqaassammata.