Amerikamiut eqqunngitsunik paasissutissiinerat uppernarsineqarpoq

Amerikamiut timmisartuat qaartartunik usisoq Pituffimmi 1968-imi nakkarmat, amerikamiut qaartartumik immamut kivisoqarsimannginneraasarnerat eqqunngitsoq maanna uppernarsineqarpoq. Isertuussiniarnerup kinguneranik qaartartoq brintimik sanaaq ukiuni 40-ni Pituffiup kangerluata naqqaniissimavoq.
novembarip 11-at 2008 10:29

Pituffimmi timmisartoq nakkarsimatsiaannartoq Amerikamiut paasisimagaluarpaat qaartartut brintimik sanaat sisamat ilaat ataaseq peqanngitsoq. Qaartartulli kigaallassaataata allunaasartai nassaarigamikkit sikup ataani immap naqqa aqqartartumik misissorsimagaluarpaat. Amerikamiulli qaartartumik ujarlernertik, immap naqqanik misissuinerinnaanerarlugu danskit pisortaqarfiannut oqaatigisarsimavaat. Taamani pisimasut pillugit allakkani maannakkut pissarsiarineqartuni allassimavoq, danskit pisortaat ujarlerneq pillugu paasiniaagaluarpata, immap naqqani misissuisoqaannartoq oqarfiigineqartassasut. Danskit naalagaaffiata iluani qaartartoq kivigaluartoq amerikamiut sakkutooqarfianniit pisimasup pasissutissartai “No foreign”-mik tassa naalagaaffinnut allanut takuteqqusaanngitsutut nalilerneqarsimapput. Tassa ukiuni 40-ni amerikamiut Pentagonimi isertortumik paasiniaasartuisa malartaaserlutik, timmisartoq nakkarmat qaartartut tamarmik aserorsimasut oqaatiniartuarsimavaat. Tuluit tusagassiorfiata BBC-p uppernarsaatit saqqummiullugit Pentagonimut paasiniaagaluaramik oqarfigineqaannarsimapput, siornatigut paasissutigineqartartut saniatigut oqaasissaqaratik.

Taamaammat Danmarkimi nunanut allanut ministereqarfik USA-mut saaffiginnittariaqartoq Inuit Ataqatigiit siulittaasuat, Kuupik Kleist oqarpoq, nangillunilu;

- Amerikamiut ukiorpassuarni eqqunngitsunik paasissutissiisarsimanerat isertuussisarsimanerallu pillugit, Danmarkimi naalakkersuisut USA-mut sakkortuumik piumaffiginittariaqarput.

Qaartartummi seeraluni, allatulluunniit avatangiisinut ajoqusiinnginnerani, nassaarineqapallattariaqartoq qaqinneqarlunilu, Kuupik Kleist oqarpoq.

Sermitsiami allaaserineqartoq naapertorlugu Enhedslistenimeersup, Line Barfodip, Folketingip Kalaallit Nunaat pillugu ataatsimiititaliaani ministeriuneq, Anders Fogh Rasmussen isumasioqatiginiarlugu piumasaqarpoq.