Amerikamiut eqqagaat salinneqartussanngorput

Uummannami eqqakkat salinneqarnissaat anguniarlugu qanorlu iliuuseqartoqarnissaanik pilersaarusiortoqarnissaanillu naalakkersuisut danskit avatangiisinut ministerianut, Troels Lund Poulsenimut siunnersuutinik tigussaasunik ukioq naatinnagu oktobarimi tunniussissasut, Danskit avatangiisinut ministeriat Troels Lund Poulsen aamma nunami namminermi pissutsinut naalakkersuisoq, Anthon Frederiksen aggustimi ataatsimiinnerminni isumaqatigiissutigivaat.

Uummannami sakkutooqarfimmut atatikkunnaarnissaa anguniarlugu kalaallinit tiguneqarnissaa, Kalaallit Nunaannit, USA-mit aamma Danmarkimit 2003-mi isumaqatigiissutigineqarpoq. Tamatumunngalu atatillugu ataatsimiititaliamik suligasuartussamik 2005-imi pilersitsisoqarpoq.

- Uummannami amerikamiunit eqqakkat qanoq iliuuseqarfigineqarnissaat paasiniarlugu danskit naalakkersuisui suliniuteqartussatut inissinnissaat isumaqatigiissutigineqarsimavoq maannalu saliisoqarnissaa iliuuseqartoqajaarnissaalu anguniarlugu naalakkersuisut pingaartikkaat, taama nunami namminermi pissutsinut naalakkersuisoq, Anthon Frederiksen oqarpoq.

Saliinissamut atatillugu aamma amerikamiut aningaasartuuteqassanngitsut oqaatigineqarpoq, saliinissamullu danskit avatangiisinut ministeriaqarfiat akisussaasuussalluni.

Narsarsuarmi tunumilu nappartarsuit eqqaannakkat naalakkersuisunit kingusinnerusukkut oqaluuserineqassasut, Anthon Frederiksen oqarpoq.