Amerikamiut dronenik Alaskami misileraalersut

Amerikamiut silaannakkut angallannermut aqutsisoqarfiat, the Federal Aviation Administration, dronenik, tassalu timmisartunik ungasianit aquttakkanik, misileraavissaminik USA-mi naalagaaffinnik arfinilinnik toqqaasimavoq. Dronit pineqartut ilaatigut Afghanistanimi ajortumeeriniat najugaannut qaartartunik saassussinermut atorneqartartutut ilisimaneqarput.
Allattoq Marianne Stenbæk, Montreal, Canada, Simon Uldum
januaarip 03-at 2014 09:20

Alaskami viceguvernøri, Mead Treadwell, dronenik Alaskami misileraasoqarnissaanik sulissuteqarsimasut ilaat, tusagassiorfinnut oqarpoq timmisartut ungasianit aquttakkat annaassiniarnermut atorneqarsinnaasut aammalu Alaskami ilisimatuussutsikkut ilisimatusarnermut pisuussutsinillu inerisaanermut atorneqarsinnaasut.

Aammattaaq oqaatigaa dronit innermik anitsisartut arsakui aqqusaarlugit timmisinnaasut aammalu orpippassuarnik ikuallattoornermi timmisartunik inuttalinnik atuinissamut navianarpallaartuni atorneqarsinnaalluartut.

- Aammattaaq uumasut miluumasut imarmiut uuliamik gassimillu qalluivinnut qaninngoortut pillugit paasissutissanik katersinermut atorneqarsinnaapput.

Mead Treadwellip oqaatigaa timmisartut inuttaqanngitsut silamut, silap pissusianut naalagaaffimmilu avinngarusimanerusuni pissutsinut allanut tunngatillugu paasissutissanik katersinermut atorluarneqarsinnaasut.

Soorlu ilaatigut nunap immikkoortuini Inuppiaat Yuppillu najugaanni.

Viceguvernøri tusagassiortunik oqaloqateqarnermini naggasiutigalugu oqaatigaa inuit suliffiup avataatigut inuunerannik sillimaniarnerannillu mianerinninnissaq pingaaruteqartupilussuusoq.

Alaskap misileraasoqarnerani naalagaaffiit Oregon Hawaiilu suleqatiginiarpai.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq