Assi: U.S. Army/Youtube

Samuelsen: Amerikamiut Camp Century illersornissamut sakkutooqarfittut atunngilaat

Camp Century Danmarkip illersornissaq pillugu USA-mut isumaqatigiissutaa tunngavigalugu pilersinneqanngilaq. Taamaakkaluartoq sakkutooqarfiup pilersinnissaata akuerinissaanut danskit naalakkersuisuisa illersornissaq pillugu isumaqatigiissut atorsimavaat, nunanut allanut tunngasunut ministeri taama ilisimatitsivoq.

USA-p Sermersuarmi Camp Centurymik pilersitsinissamut 1959-imi akuerineqarneranut isumaqatigiissut suna tunngavigineqarsimanersoq suli nalunarpoq.

Folketingimut ilaasortaq Nunatta Qitornaaneersoq Aleqa Hammond, Camp Century pillugu Folketingimi marlunngormat isumasioqatigiittoqarnerata kingorna taama isumaqarpoq.

Camp Centuryp nunatsinni illersornissamut sakkutooqarfiunnginnera Nunanut allanut tunngasunut ministerip Anders Samuelsenip isumasioqatigiinnermi ilisimatitsissutigaa.

AAMMA ATUARUK Regeringen undersøger USA’s ansvar for forurening

- Camp Century Illersornissaq pillugu isumaqatigiissummut (1951-imeersoq, aaqq.) teknikkikkut ilanngussani allanneqarsimanngilaq, illersornissamut sakkutooqarfiit taakkunani nalunaarsorneqarput, ingerlaavartumillu nutarterneqartarsimallutik. Aamma Camp Centuryp illersornissaq pillugu isumaqatigiissut malillugu illersornissamut sakkutooqarfiunissaminut piumasaqaataasunik naammassinnisimanissaanut tunngavissaqartinneqarsimanngilaq, nunanut allanut tunngasunut ministeri oqarpoq.

Aammattaaq Camp Century USA-p sakkortooqarnikkut ingerlataqarnissaminut akuerineqarsimaffigisaata Pituffiup avataani pilersinneqarpoq, Samuelsen erseqqissaavoq.

- Taamaammat Nunanut allanut tunngasunut ministereqarfiup Camp Centuryp illersornissaq pillugu isumaqatigiissummut tunngatillugu illersornissamut sakkutooqarfittut nalilernissaanut tunngavissaqarsorinngilaa, taama inerniliisoqarpoq.

Illersornissaq pillugu isumaqatigiissut tunngavigineqartoq

Amerikamiulli Camp Centuryp sanaartorneqarnera aallartereersoq sanaartornissamut akuerineqarnissamik noqqaassuteqarmat, danskit amerikamiullu naalakkersuisuisa Kunngeqarfiup illersornissaq pillugu USA-mut isumaqatigiissut 1951-imeersoq tunngavigisimavaat.

- Camp Centurymut tunngatillugu illersornissamut isumaqatigiissutip atorneqarsinnaanera naalakkersuisut (danskit, aaqq.) USA-llu naalakkersuisuisa isumaqatigiissutigisimavaat, Anders Samuelsen oqarpoq.

AAMMA ATUARUK Danskit kilitsissiaqarsimanerat Samuelsenip ilisimasaqarfiginnginnerarpaa

Amerikamiut sakkutuuisa (…) ilisimatusarnikkut suliaqarnerinut akuersissuteqarnikkut tamanna pisimasoq, nunanut allanut tunngasunut ministerip ilisimatitsissutigaa. 'Kalaallit Nunaanni sakkutooqarnikkut periarfissat naammassineqarsinnaasullu misissornissaasa siunertarineqarnera' danskit naalakkersuisuinit ilisimaneqarsimavoq, taamaammat aamma Camp Century sakkutooqarnikkut ilisimatusarfeqarfiusimavoq, Samuelsen naqissusiivoq.

Mingutsitsisoqarsimaneranut tamatumalu salinneqarnissaanut akisussaaffiup kimut inissinneqarnissaanut Camp Century pillugu isumaqatigiissutitigut tunngavigineqartoq aalajangiisuusoq, Aleqa Hammond isumaqarpoq. Nunanulli allanut tunngasunut ministerip akissutigisaa tukattoq, Hammond isumaqarpoq.

- Ullumi Ministeri nalunaarpoq apeqqut una sakkutooqarnermut tunngassuteqarani illersornissamut ilisimatusarnermut tunngassuteqartoq. Nassuiaallu taanna aamma allaavoq. Allaanngilaq naalakkersuisut nalornissutigigaat illersornissamut, Ilisimatusarnermut imaluunniit allarluinnarmut tunngasuunersoq oqaatigisanerlugu nalornissutigigaat, tusagassiorfinnut nalunaaruteqarluni taama allappoq.

Lektori: Tukappoq, eqqortuuvorli

Aarhusip Universitetiani lektori soraarneq, Henry Nielsen, Camp Centurymut tunuliaqutaasumik ilisimatusarsimasoq naapertorlugu, Anders Samuelsenip akissutigisaa paasiuminaalaarsinnaavoq eqqortuullunili.

AAMMA ATUARUK Ataatsimiititaliaq Camp Century pillugu paasissutissanik amerlanerusunik ujartuisoq

Illersornissarmi pillugu isumaqatigiissut 1951-imeersoq naapertorlugu, USA Pituffiup avataani sakkutooqarnikkut suliassanut tamanut akuerineqarnissamik qinnuteqaateqaqqaartussaavoq.

Taamaammat Camp Century pillugu isumaqatigiissut illersornissaq pillugu isumaqatigiissummut atasumik isumaqatigiissutigineqarpoq, immikkoortunilli piumasaqaateqartillugu - soorlu assersuutigalugu danskit oqartussaasui sakkutooqarfimmi pisunik tamanik misissuisinnaatitaassasut.

- Sakkutooqarnikkut ilisimatusarnermik aamma ingerlatsisoqarnerata akisussaasunit ilisimaneqarsimanera qularutissaanngilaq. Amerikamiut sakkutooqarnermut attuumassuteqanngitsumik ilisimatusarnermik ingerlatsinissaannik isumaqartoqasimassapat tamanna uppianertut taasariaqarpoq, Henry Nielsen oqarpoq.

AAMMA ATUARUK Danmark Camp Centurymi kilitsissiaqarsimasoq

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat