Amerikamiut aviisiat: Kalaallit Nunaannik Danmarkimillu kilitsissiatut suliaqarnermi USA annertusaaniarpoq
Namminiilivinnissaq pillugu suliniuteqarneq pillugu USA paasisaqarnerorusuppoq, qeqertamillu tiguaarusunnermik tapersersuisunik ujartuilluni.
Nunarsuaq tamakkerlugu uissuummissutigineqartumik USA nunarsuarmi qeqertat annersaannik tiguaarusussuseqarnerminik nalunaarutiginnereernerata kingorna, kilitsissiatut suliaqarnerminik annertusaaniarpoq.
Amerikamiut aviisiat Wall Street Journal naapertorlugu paasissutissat taakku suliamut ilisimasallit marluk oqaasianeersuupput.
Aviisi naapertorlugu isertortumik paasiniaasartut Kalaallit Nunaanni kilitsissiatut suliaqarnerulernissamik USA-p naalakkersuisuisa qinnuigisimavaat.
Namminiilivinnissaq pillugu suliniut pillugu Amerikamiullu pisuussutinik piiaanissaq pillugu isumaannik paasisaqarnerujumaneq pissutigalugu tamanna pivoq.
Amerikamiut pingaarnerpaatitai pillugit nalunaarut isertortumik paasiniaasarfinnut arlalinnut sapaatip-akunnerata siuliani nassiunneqarpoq.
Amerikamiut qeqertamut tunngatillugu anguniagaannik Kalaallit Nunaanni Danmarkimilu inuit tapersersuisut kinaassusersinissaannut isertortumik paasiniaasartut qinnuigineqarsimanerinik tamanna imaqarpoq.
Præsident Donald Trumpip pisortaqarfiata Kalaallit Nunaannik tiguaaniarluni anguniagaata piviusunngortinnissaanut tamanna iliuuserisimasaasa siullersaat ilagaat.
Isumannaatsuuneq pillugu ernumasoq
Danmark USA-lu ukiuni qulikkuutaani iligiiunerat pillugu aviisi allaaserinnippoq.
Paasissutissanik katersuinermut tunngasunik Det Hvide Hus oqaaseqarnianngitsoq, USA-mi Isumannaallisaanermut Siunnersuisoqatigiit oqaaseqartartuat oqarpoq.
"Kalaallit Nunaatali Issittullu isumannaatsuunissaat pillugu præsidenti erseqqissumik oqariartuuteqartoq", nangilluni oqarpoq.
Trump sakkutuulersorsinnaanermik itigartitserusussimanngilaq.
Danmarkilli USA-llu illersornissaq pillugu isumaqatigiissutaat 1951-imeersoq naapertorlugu Amerikamiut Kalaallit Nunaannut isersinnaapput sakkutuunillu amerlanerusunik aallartitsisinnaallutik.
Isumaqatigiissut nutarterneqarmat Kalaallit Nunaat 2004-mi ilannguppoq.
/ritzau/
