Amerikamiut aningaasanik sullissivii pututitsiniaqataasarsimapput
Amerikamiut iliornerat isumassarsiullaqqissumik naatsorsuusiortarnikkut akiligassaqarfinnullu taaguutitigut pututitsiniutaasutigut pisarsimasoq New York Timesip ullumi qulaarpaa.
Grækerit akiligassaasa takujuminaallisarneranni periaaseq tamanna atorneqarsimavoq, nunarsuarmi tamarmi aningaasaqarnerup ajalusoorneranik kinguneqartumik. Naalagaaffiup akiligassaasa amerliartuinnarnerat ilutigalugu siunertarineqarsimavoq naalagaaffiup naatsorsuutaasa isornanngitsumik isikkoqarnissaat. Tamanna pisinnaasimavoq aningaasaqarnikkut isumaqatigiissutit paasiuminaatsut atorlugit, tassalu taarsigassarsiniarneq aningaasanik nioqquteqarnertut isikkoqalersillugu. Amerikami aningaasaqarnikkut ajalusoorneq illuutinik nioqquteqarnermi aallartippoq, illuutillit akilersinnaanngisaannik taarsigassarsiniaqqullugit pilerisaarnerisigut. Aningaaseriviit taamaalillutik illut utertillugit tigusinnaavaat piginnittut ernianik akilersuutinillu akilersuisinnaajunnaarpata, tamannalu illuutit akii taama qaffasitsigitillugit aningaaseriviit iluanaarniutigilluarsimallugu, taavalu unittoorneqarmat sunarpassuit tamarmik aallartinneqarlutik. Taarsigassarsiat nalorninaatillit aningaasanik naleqanngillat taamaalillutillu aningaaseriviit aningaasanillu sullissiveqarfiit assorsuaq ajunaaruteqarlutik. Tamannalu aningaaserivinni sulisut nassaarsiullaqqissut qangali paaseriikatassimavaat ilunaaarutigilluarlugulu, qularnanngitsumik iluanaarniutigalugu isumaqatigiissusiortarnermikkut. Ukiut qulingiluat ingerlaneranni tamakkua euromik aningaasalinni arlalinni pisarsimapput, EU-mi suleqatiminnut kisitsisitigut takutittarlugit ataatsimullu aningaasaqarnermut ilanngunniarlutik. Pingaartumik Grækenland Italialu Amerikami aningaasanik sullissivissuarni immikkut paasisimasalinnit naatsorsuutit kusassanerannik annertuumik ikiorneqartarsimapput, soorlu Goldman Sachsimi assigisaannilu. Taama iliortarnerat ima ingerlalluartigisimavoq tamanna aatsaat decembarimi paasineqarluni. Naalakkersuisut immikkut paasisimasalinnik ikiortissarsiortarnerminni tunngavilersuutaat tassaasimapput sapinngisamik sivisunaartumik akiligassaqarfinnik toqqorterineq, aningaasarissaalernissami putut immersorneqarnissaat neriuutigalugu. Pisortat aningaasaataannik piisaarneq qineqqusaarutaalluartarsimavoq, peqquserluttuliornikkullu annertuukkut putut isumannaarneqartarsimanatik.
Amerikami aningaasanik sullissivinni New York Timesip qulaarsinera USA-mi tupaallaatigineqarpallaanngilaq, EU-llu nunani taakkunani akiligassaqarfiit paasiuminaatsut assorsuarlu amigartoorutaasimaqisut misissorlualerlugit, Danmarkip Radioa taama nutaarsiassaqartitsivoq.
