Amerikamiut Afghanistanimi sakkutuui 30-t juulimi toqutaareerput

Sakkutuut amerikamiut 30-t Afghanistanimi juulip qaammataani toqutaareerput, Afghanistanip kangisissuani qaartartoq aqquserngup sinaanut inissinneqarsimasoq ippassaq qaarmat sakkutuut sisamat toqutaareersullu. Amerikamiut sakkutuuinik qaammammut annaasaqartarneq eqqarsaatigalugu, juulimi sapaatip akunnerisa pingasut ingerlanerinnaanni maannamut tassa nutaamik rekortiliisoqarpoq.
juulip 21-at 2009 12:41

Sakkutuut nunanit tamaneersut katillugit 56-it Afghanistanimi juulip qaammataani inuunerminnik annaasaqarput. Afghanistanimi sorsunneq 2001-ip naalernerani aallartimmalli sakkutuut aatsaat taama amerlatigisut inuunerminnik annaasaqarput.

Sakkutuut taama amerlatigisut inuunerminnik annaasaqareeraluartut Nunat Killiit Illersoqatigiiffiat, NATO, ermumasariaqanngilaq. NATO-mi qullersaasimasoq, Jaap De Hoop Scheffer, ippassaq oqarpoq, NATO Afghanistanimi arlaannik kukkussuteqaraluarpat peqqarniisaarneq nunarsuaq tamakkerlugu siaruaatissasoq.

Qaartartut aqquserngup sinaanut inissinneqarsimasut pissutigalugit sakkutuunik nunanit tamaneersunit annaasaqartarpugut. Qaartartut taamaattut sananissaat ajornanngitsuararsuuvoq, sakkortoqaalli, naggorissaatissat dieselilu atorlugu sanaajullutik. Amerikamiut sakkutuuinit 30-nit qaammatip uuma ingerlanerani toqutaasunit 21-t qaartartup taamaattup qaarneranit toqutaapput.